कीर्तिपुरको टीयू मैदानमा शनिबार सम्पन्न नेपाल प्रिमियर लिगको खेलमा काठमाडौं गोर्खाजले लुम्बिनी लायन्सलाई ३६ रनले हराउँदै आफ्नो तेस्रो जित दर्ता गरेको छ। यो जितसँगै काठमाडौंले लुम्बिनीको लगातार दश खेलको विजयी यात्रामा पूर्णविराम लगाइदिएको छ।
पहिले ब्याटिङ गरेको काठमाडौंले २० ओभरमा आठ विकेट गुमाएर १६० रन बनाएको थियो। ओपनर डेविड वार्नरले ५० बलमा नौ चौका र एक छक्कासहित ६६ रन बनाए भने साहिल पटेलले ३८ रन जोडे। दुईले पहिलो विकेटका लागि १०४ रनको साझेदारी गरेपछि काठमाडौंले १२ ओभरमा बिना विकेट सय रन पूरा गरेको थियो। सहान अराचिगेले १५ बलमा अविजित ३४ रन बनाए। तर मध्यक्रम ढलेपछि टोली १६० रनमै रोकियो। लुम्बिनीका लागि अभिशेष गौतम, शेर मल्ल र रुबेन ट्रम्पलम्यानले दुई–दुई विकेट लिए।
१६१ रनको लक्ष्य पछ्याएको लुम्बिनीको सुरुवात निकै कमजोर रह्यो। पावरप्लेमै छ विकेट गुमाएपछि टोली दबाबमा परेको थियो। सन्दिप जोराले एक छेउ सम्हाल्दै ४५ बलमा ४५ रन बनाए पनि अरू ब्याटर टिक्न सकेनन्। लुम्बिनी १९.३ ओभरमा १२४ रनमै अलआउट भयो। काठमाडौंका जहानदाद खानले २३ रन खर्चेर चार विकेट लिए भने कप्तान करण केसीले एक मेडनसहित २४ रन दिएर दुई विकेट लिए।
अघिल्लो सिजन च्याम्पियन बन्दा लगातार छ खेल जितेको लुम्बिनी यस सिजनका पहिलो चार खेलमा पनि अपराजित थियो। हारका बाबजुद लुम्बिनी पाँच खेलबाट सात अंकसहित शीर्ष स्थानमै छ। पहिलो खेल हारेपछि लगातार तीन जित निकालेको काठमाडौं चार खेलबाट छ अंकसहित दोस्रो स्थानमा उक्लिएको छ।
