काभ्रेपलाञ्चोक — आगामी निर्वाचनलाई लक्षित गर्दै काभ्रेपलाञ्चोकमा मतदानस्थल र मतदान केन्द्रको पुनरावलोकन प्रक्रिया सुरु भएको छ। जिल्लास्थित मतदानस्थल तथा मतदान केन्द्र निर्धारण तथा सिफारिस समितिको बैठकले पुनरावलोकनको कार्यतालिका तय गरेको हो।
समितिले गत भदौ १५ गतेसम्म अद्यावधिक गरी असोज ३० गते प्रकाशित मतदाता नामावलीलाई पुनरावलोकनको आधिकारिक आधार बनाउने निर्णय गरेको छ। समितिका संयोजक एवं प्रमुख जिल्ला अधिकारी गोपालकुमार अधिकारीका अनुसार जिल्लामा क्रियाशील राजनीतिक दललाई आगामी मङ्सिर १ गतेभित्र हाल कायम मतदानस्थलको सूचीसहित पत्राचार गरी राय–सुझाव मागिनेछ।
आउँदो मङ्सिर ४ गतेभित्र वडा समितिलाई कार्यविधि, अनुसूची फाराम, मतदानस्थलको सूची र सम्बन्धित वडाको अन्तिम मतदाता नामावलीसहित पत्राचार गरिनेछ। वडाध्यक्षको संयोजकत्वमा रहेको समितिले मङ्सिर १५ गतेभित्र मतदानस्थलको अवस्था, भौगोलिक दूरी, सुरक्षा अवस्था र आवश्यकताका विषयमा अध्ययन गरी सर्वसम्मत निर्णय गर्नुपर्नेछ। वडा समितिका निर्णय मङ्सिर २५ गतेभित्र निर्वाचन कार्यालयमा पठाउनुपर्नेछ।
मङ्सिर २९ गतेभित्र प्राप्त सिफारिसको एकीकृत विवरण तयार गरी जिल्ला समितिको बैठकमा अध्ययन गरिनेछ। आवश्यक परे स्थलगत अध्ययनसमेत गरी अन्तिम निर्णय गरिने अधिकारीले बताए। जिल्ला समितिको निर्णय आगामी पुस ५ गतेभित्र निर्वाचन आयोगमा पठाइनेछ।
गत वर्ष फागुनमा सम्पन्न प्रतिनिधिसभा निर्वाचनमा काभ्रेपलाञ्चोकका दुई निर्वाचन क्षेत्रमा १८९ मतदानस्थल र ४०० मतदान केन्द्र कायम गरिएको थियो। तीमध्ये ८८ संवेदनशील र २३ अतिसंवेदनशील थिए भने १०१ सामान्य थिए। पछिल्लो विवरणअनुसार जिल्लामा तीन लाख २४ हजार नौ मतदाता छन्। दोहोरो दर्ताका एक हजार १९८, मृत्यु भएका एक हजार ४०२ र नागरिकता परित्याग गरेका दुई गरी दुई हजार ६०२ जनाको नाम नामावलीबाट हटाइएको जिल्ला निर्वाचन कार्यालय धुलिखेलले जनाएको छ।
