काठमाडौँ । नेपाली कांग्रेसका उपसभापति मधु आचार्यले वर्तमान सरकार प्रतिशोध, क्रोध, भय र भ्रमको आधारमा चलिरहेको आरोप लगाएका छन् ।
रिपोर्टर्स क्लब नेपालले सोमबार काठमाडौँमा आयोजना गरेको साक्षात्कारमा बोल्दै आचार्यले सरकार गठन भएको छ महिना पनि नपुग्दै पारदर्शितामाथि गम्भीर प्रश्न उठ्न थालेको बताए । सरकारको कार्यशैली, निर्णय गर्ने तरिका र सरोकारवालासँगको संवादको अभावले मुलुकमा बिचौलियाहरू हाबी हुने अवस्था बनेको उनको भनाइ थियो ।
कार्यकारी र सरोकारवालाबीच नियमित संवाद नहुँदा बिचौलियाहरूले सरकारका नाममा आफ्नो स्वार्थ पूरा गर्ने मौका पाइरहेको उनले उल्लेख गरे । आचार्यले दानबहादुर कार्कीलाई पदबाट हटाइएको विषयमा समेत सरकारले स्पष्ट पार्नुपर्ने बताए । सरकारले उक्त निर्णयको आधार र कारण सार्वजनिक गर्नुपर्ने उनको माग छ ।
प्रमुख प्रतिपक्षी दल नेपाली कांग्रेस सरकारलाई आवश्यक सहयोग गर्न तयार रहे पनि सरकारले सहकार्यको वातावरण बनाउन नखोजेको आचार्यले बताए । उनले संसद्लाई छलेर अध्यादेशमार्फत शासन चलाउन खोजिएको टिप्पणी गर्दै विधायिकाको भूमिकालाई कमजोर बनाउन नहुने धारणा राखे ।
