देशका पाँच जिल्लामा जुवातास खेलिरहेको अवस्थामा प्रहरीले एकै दिन १०७ जनालाई पक्राउ गरेको छ। उनीहरूको साथबाट २३ लाख ८ हजार ५०९ रुपैयाँ नगद, तास र कौडा बरामद भएको छ।
नेपाल प्रहरीको केन्द्रीय समाचार कक्षका अनुसार पक्राउ पर्नेहरू सुर्खेत, ललितपुर, काभ्रे, धनुषा र सर्लाहीका विभिन्न स्थानबाट समातिएका हुन्।
सुर्खेतको वीरेन्द्रनगर नगरपालिका-४ मुलपानीचोकस्थित सुशील भारतीको घरमा जुवातास खेलिरहेका भारतीसहित १२ जना पक्राउ परे। उनीहरूको साथबाट चार लाख एक हजार ४८५ रुपैयाँ बरामद भयो। त्यस्तै वीरेन्द्रनगर-१० बुलबुले चोकबाट अर्जुन जंग शाहीसहित १० जना समातिए भने उनीहरूबाट एक लाख ८१ हजार १०० रुपैयाँ फेला पर्यो। वीरेन्द्रनगर-३ गण्डकी लाइनबाट मानबहादुर गुरुङसहित आठ जना पक्राउ पर्दा तीन लाख ७७ हजार ८५० रुपैयाँ बरामद भयो।
वीरेन्द्रनगर-६ खोर्केलाइनबाट कबिराम विकसहित ११ जना पक्राउ परे। उनीहरूको साथबाट एक लाख २७ हजार ८५ रुपैयाँ र १३ बुक तास बरामद भएको प्रहरीले जनाएको छ।
ललितपुरको गोदावरी नगरपालिका-१३ झरुवारासीस्थित रामसिंह खड्काको घरबाट खड्कासहित नौ जना पक्राउ परे। उनीहरूबाट एक लाख ५८ हजार ७१५ रुपैयाँ र चार बुक तास बरामद भयो। गोदावरी-१० प्याङगाउँबाट सन्तोष तिमल्सिनासहित दुई जना समातिए भने उनीहरूबाट ४० हजार ३०५ रुपैयाँ र एक बुक तास फेला पर्यो।
काभ्रेको पाँचखाल नगरपालिका-७ श्रीरामपाटीस्थित सार्वजनिक प्रतीक्षालयमा जुवातास खेलिरहेका सुवास दनुवारसहित ११ जना पक्राउ परे। उनीहरूको साथबाट ६१ हजार ५९० रुपैयाँ, १६ थान कौडा र एक बुक तास बरामद भयो।
धनुषाको जनकपुरधाम उपमहानगरपालिका-१४ रजौलस्थित साजन टेन्ट हाउसबाट मनिषकुमार धामीसहित १८ जना पक्राउ परे। उनीहरूबाट एक लाख ६१ हजार ६४४ रुपैयाँ र तीन बुक तास बरामद भएको छ।
सर्लाहीको मलंगवा नगरपालिका-८ बाट रामबहादुर साहसहित नौ जना पक्राउ पर्दा उनीहरूको साथबाट ६ लाख ७८ हजार ५६० रुपैयाँ र चार बुक तास बरामद भयो। त्यस्तै ब्रह्मपुरी गाउँपालिका-१ बाट सुजितकुमार साहसहित १७ जना समातिए भने उनीहरूबाट तीन लाख २० हजार १७५ रुपैयाँ र चार बुक तास फेला पर्यो।
सबै घटनामा प्रहरीले आवश्यक अनुसन्धान गरिरहेको केन्द्रीय समाचार कक्षले जनाएको छ।
