गाजामा शुक्रबार साँझदेखि परेको मुसलधारे वर्षाले विस्थापित नागरिक बसिरहेका अस्थायी शिविर डुबानमा परेपछि मानवीय संकट झन् गहिरिएको छ। संयुक्त राष्ट्रसंघले सोमबार यो अवस्थाप्रति गहिरो चिन्ता व्यक्त गरेको हो।
संयुक्त राष्ट्रसंघीय मानवीय मामिला समन्वय कार्यालय (ओसीएचए) का अनुसार वर्षाले गाजाका विभिन्न भागमा बाढी ल्याएको छ। सहायता वितरण केन्द्र र विद्यालय भवनमा क्षति पुगेको छ भने अत्यावश्यक सेवाहरू अवरुद्ध भएका छन्।
बाढीमा डुबेर एक शिशुको ज्यान गएको छ। अर्को घटनामा बालुवाको ढिस्को भत्किएर पालमाथि खस्दा तीन बालबालिका र दुई महिलाको मृत्यु भएको छ। हजारौं परिवारले अस्थायी बास र व्यक्तिगत सामान गुमाएका छन्।
राहत संस्थाहरूले तत्काल उद्धार र सामग्री वितरण सुरु गरेका छन्। तर गाजाभित्र पाल, त्रिपाल, कम्बल र कपडाजस्ता अत्यावश्यक सामग्रीको भण्डार लगभग सकिएको ओसीएचएले जनाएको छ। पानी निकाल्ने ठूला सवारीसाधन, मोबाइल पम्प, इन्जिन आयल, पाइप र भारी उपकरण तत्काल चाहिने उल्लेख छ। सहायता साझेदार संस्थाहरूले खरिद गरेका एक लाख ५० हजारभन्दा बढी पाल गाजाबाहिर पठाउन तयार अवस्थामा छन्।
अधिकृत प्यालेस्टिनी भूभागका लागि राष्ट्रसंघीय मानवीय संयोजक रामिज अलाक्बारोभले सोमबार रामल्लाहमा भने— वर्षा प्राकृतिक घटना भए पनि मानिसहरू त्यसबाट प्रभावित हुने अवस्था मानव सिर्जित हो। निरन्तरको द्वन्द्वले आवास र पूर्वाधार ध्वस्त भएको र कडा प्रतिबन्धले जोखिमयुक्त तटीय क्षेत्रबाट सुरक्षित ठाउँमा सर्न कठिन भएको उनले बताए। गाजाका अधिकांश नागरिक अहिले जीर्ण पालमा बस्न बाध्य छन्, जसले सामान्य वर्षा र हुरीसमेत सहन सक्दैनन्।
ओसीएचएका अनुसार गाजाका घना बस्ती भएका क्षेत्रमा हवाई आक्रमण जारी छ। शनिबार गाजा सहरको ‘येलो लाइन’ पश्चिमतर्फको शिविरमा पुगेका राष्ट्रसंघीय कर्मचारीहरू नजिकै गोली चलेपछि सुरक्षित स्थानमा आश्रय लिन बाध्य भए। कार्यालयले अन्तर्राष्ट्रिय मानवीय कानुनअनुसार सर्वसाधारणको सुरक्षा सुनिश्चित गर्न सम्बन्धित पक्षलाई पुनः आग्रह गरेको छ।
