अमेरिकी रक्षामन्त्री पिट हेगसेथविरुद्ध प्रतिनिधिसभामा महाभियोग प्रस्ताव दर्ता भएको छ। रिपब्लिकन सांसद थोमस मासीले सोमबार आठवटा आरोपसहित प्रस्ताव पेस गरेका हुन्। रोयटर्सका अनुसार यसै साता प्रस्तावमाथि मतदान हुन सक्छ।
मासीले हेगसेथमाथि संसद्को अनुमतिबिना इरानविरुद्ध युद्ध अघि बढाएको र अधिकार दुरुपयोग गरेको आरोप लगाएका छन्। सिनेटर मार्क केलीको अभिव्यक्ति स्वतन्त्रता उल्लंघन गरेको आरोप पनि प्रस्तावमा समेटिएको छ।
विशेष प्रक्रियाअन्तर्गत प्रस्ताव पेस भएकाले सभामुख माइक जोन्सनले दुई कार्यदिवसभित्र यसलाई मतदानमा लैजानुपर्ने हुन्छ। तर उनले प्रस्तावलाई समितिमा पठाउन वा मतदानबाट रोक्न पनि सक्छन्। प्रतिनिधिसभामा साधारण बहुमतले प्रस्ताव पारित हुन सक्छ, तर त्यसपछि सिनेटमा सुनुवाइ हुन्छ र दुईतिहाइ मतले दोषी ठहर भए मात्र हेगसेथ पदबाट हट्छन्। सिनेटमा रिपब्लिकनका ५३ सदस्य रहेकाले दोषी ठहर हुने सम्भावना न्यून देखिन्छ।
राष्ट्रपति डोनाल्ड ट्रम्पले भने हेगसेथको बचाउ गरेका छन्। ‘उनले दुई युद्ध जितेका छन्। उनलाई महाभियोग कसरी लगाउन मिल्छ?’ भन्दै ट्रम्पले आफू उनको साथमा रहने बताएका छन्। तर आफ्नै पार्टीभित्र पनि असन्तुष्टि बढ्दै गएको छ। रिपब्लिकन सिनेटर थोम टिलिसले हेगसेथलाई समर्थन गरेको आफ्नो निर्णयलाई जीवनकै ठूलो पश्चात्ताप भनेका छन्। डेमोक्र्याटिक नेता हाकिम जेफ्रिजले प्रस्तावको समर्थन गरेका छन् भने सिनेटका अल्पमत नेता चक सुमरले सुनुवाइ हुनुपर्ने बताएका छन्।
इरान युद्ध लम्बिएपछि यसको राजनीतिक जिम्मेवारीबारे बहस चर्किएको छ। गत फेब्रुअरी २८ मा इसराइलसँग मिलेर अमेरिकाले इरानमाथि आक्रमण गरेको थियो। युद्ध चारदेखि पाँच सातामै सकिने ट्रम्पको दाबी थियो, तर होर्मुज जलडमरूमध्यमा अवरोधपछि विश्व ऊर्जा आपूर्तिमा असर पर्यो। मध्यावधि निर्वाचनमा रिपब्लिकन पराजयको प्रमुख कारणमध्ये एक यही युद्ध मानिएको छ। सीबीएस न्युजका अनुसार ट्रम्पले सहयोगीहरूसँग हेगसेथलाई पदमा राख्ने कि हटाउने भन्नेबारे छलफल गरिरहेका छन्।
