पोखरा — पर्यटकीय याम सुरु भएसँगै पोखरास्थित अन्तर्राष्ट्रिय पर्वतीय सङ्ग्रहालय घुम्न आउने पर्यटकको सङ्ख्या उल्लेख्य रूपमा बढेको छ। चाडपर्वको समयसँगै स्वदेशी र विदेशी दुवैथरी पर्यटकको आगमन बढेको सङ्ग्रहालयकी कार्यकारी निर्देशक निर्मलाकुमारी न्यौपानेले जानकारी दिइन्।
चालु आर्थिक वर्ष २०८३/८४ को कात्तिक २० गतेसम्म सङ्ग्रहालयमा २० हजार ९ सय ३८ जना पर्यटक पुगेका छन्। त्यसमध्ये सार्क मुलुकबाट दुई हजार ८ सय ६८ जना, सार्कबाहेक अन्य देशबाट छ हजार २९ जना र ४१ जना गैरआवासीय नेपाली रहेका छन्।
मासिक तथ्याङ्कअनुसार साउनमा चार हजार ९ सय ९९ जना, भदौमा तीन हजार ३ सय ४७ जना, असोजमा छ हजार ४ सय ३ जना र कात्तिक २० गतेसम्म छ हजार १ सय ८९ जना पर्यटक सङ्ग्रहालय पुगेका छन्।
पर्वतीय पर्यटनका विभिन्न पक्षलाई नजिकबाट चिनाउने उद्देश्यले निर्माण गरिएको यो सङ्ग्रहालयमा हिमाली जीवनशैलीसँगै पर्वतीय क्षेत्रमा बसोबास गर्ने समुदायका रीतिरिवाज, वेशभूषा, कला, संस्कृति र भौगोलिक अवस्थाबारे विस्तृत जानकारी पाउन सकिन्छ। त्यसैले पछिल्लो समय सङ्ग्रहालय पर्यटकका लागि आकर्षक गन्तव्यका रूपमा विकास हुँदै गएको छ।
