कृत्रिम बुद्धिमत्ता (एआई) पूर्वाधार निर्माणमा विश्वभर बढेको लगानीसँगै चीनको निर्यातमा उल्लेख्य वृद्धि भएको छ। यससँगै चीनको व्यापार बचत पहिलोपटक चालु वर्षको पहिलो १० महिनामै १ ट्रिलियन डलर नाघेको छ।
चीनको भन्सार प्रशासनले मंगलबार सार्वजनिक गरेको तथ्यांकअनुसार सन् २०२६ को जनवरीदेखि अक्टोबरसम्म चीनको व्यापार बचत १.०४ ट्रिलियन डलर पुगेको छ। लगातार दोस्रो वर्ष चीनको व्यापार बचत १ ट्रिलियन डलरभन्दा माथि पुगेको हो। गत वर्षको तुलनामा यस वर्ष उक्त सीमा एक महिनाअघि नै पार भएको छ।
अक्टोबरमा चीनको निर्यात अघिल्लो वर्षको सोही महिनाको तुलनामा ३५.२ प्रतिशतले बढेको छ। सेप्टेम्बरमा निर्यात वृद्धिदर ३६.३ प्रतिशत थियो। अर्थशास्त्रीहरूले अक्टोबरमा ३३.५ प्रतिशत वृद्धिको अनुमान गरेका थिए, तर वास्तविक वृद्धिदर अनुमानभन्दा बढी देखिएको छ।
चालु वर्षको पहिलो १० महिनामा सेमिकन्डक्टर निर्यात अघिल्लो वर्षको सोही अवधिको तुलनामा १११.१ प्रतिशतले बढेको छ। समग्र उच्च प्रविधियुक्त उत्पादनको निर्यात ४७.९ प्रतिशतले वृद्धि भएको छ। अक्टोबरमा आयात पनि ४१.६ प्रतिशतले बढेको छ, जुन अर्थशास्त्रीहरूको ३२ प्रतिशतको अनुमानभन्दा निकै बढी हो।
यता घरेलु माग कमजोर हुँदा चिनियाँ अर्थतन्त्र बाह्य बजारको मागमा बढी निर्भर हुँदै गएको छ। उपभोक्ताले खर्च गर्न अनिच्छा देखाइरहेका छन् भने घरजग्गा बजारको लामो मन्दीले घरपरिवारको सम्पत्तिमा असर पारेको छ। घरेलु बजारमा सवारीसाधनको बिक्री लगातार १२औँ महिनासम्म घटेको छ, तर कार निर्यातले भने राम्रो वृद्धिदर कायम राखेको छ।
अक्टोबरमा अमेरिकासँगको व्यापार बचत सेप्टेम्बरको ३४ अर्ब १ करोड डलरबाट घटेर ३२ अर्ब ७१ करोड डलर पुगेको छ। बेइजिङ र वासिङ्टनले मंगलबारदेखि समाप्त हुन लागेको व्यापार युद्धविरामलाई थप दुई महिना लम्ब्याउने सहमतिलाई सोमबार औपचारिक रूप दिएका थिए। तर बढ्दो व्यापार बचतले युरोपेली संघ र अमेरिकासँगको व्यापारिक सम्बन्धमा थप तनाव सिर्जना गर्न सक्ने देखिएको छ।
