काठमाडौँ — आठ नाटो सदस्य राष्ट्रले बाल्टिक सागरमा पाँचदिने पनडुब्बी विरोधी सैन्य अभ्यास सुरु गरेका छन्। स्विडेनको नेतृत्वमा सोमबारदेखि शुक्रबारसम्म चल्ने अभ्यासमा बेलायत, क्यानडा, डेनमार्क, फिनल्यान्ड, फ्रान्स, जर्मनी र नेदरल्यान्ड्स सहभागी छन्।
अभ्यासमा हजारौँ नौसैनिक, जर्मनी र स्विडेनका पनडुब्बी, विभिन्न देशका युद्धपोत तथा हवाई गस्तीका साधन प्रयोग गरिँदै छन्। अभ्यासअन्तर्गत पनडुब्बी पत्ता लगाउने र तिनको निगरानी गर्ने विभिन्न चरणका गतिविधि सञ्चालन गरिनेछ।
नाटोका एक वरिष्ठ कमाण्डरले पनडुब्बीलाई निरन्तर सुरक्षा चुनौतीका रूपमा व्याख्या गरेका छन्। पनडुब्बीसम्बन्धी नाटोका कमाण्डर रियर एडमिरल जोन क्र्याडकले समुद्रमुनि निरन्तर प्रभाव कायम राख्न सक्ने एकमात्र प्रविधि पनडुब्बी रहेको बताए। उनले पनडुब्बी पत्ता लगाउने सीप निरन्तर अभ्यास नगरे खस्कँदै जाने बताए।
बाल्टिक सागर पश्चिमी राष्ट्रहरूले रुसमाथि आरोप लगाउँदै आएका तथाकथित ‘हाइब्रिड युद्ध’ गतिविधिको प्रमुख क्षेत्र बनेको छ। नाटोले यस क्षेत्रमा आफ्नो नौसैनिक उपस्थिति बढाएको छ। सैन्य विज्ञहरूका अनुसार उथलो समुद्र र तीव्र जलयातायातका कारण पनडुब्बी पत्ता लगाउन प्रयोग हुने ध्वनि सङ्केत पहिचान गर्न कठिन हुन्छ, जसले पनडुब्बीलाई लुक्न सहयोग पुर्याउँछ।
फ्रान्सेली नौसेनाका रियर एडमिरल निकोलस मोलिटरले समुद्रमुनिका केबल तथा पाइपलाइनका कारण सुरक्षा चुनौती बढेको बताए। उनले मानवरहित उपकरण तथा रोबोटबाट समेत खतरा रहेको र समुद्रमा लङ्गर घिसार्दै हिँड्ने पानीजहाजले अत्यावश्यक पूर्वाधारमा क्षति पुर्याउन सक्ने उल्लेख गरे।
