चिप निर्माता कम्पनी एनभिडियाका प्रमुख कार्यकारी जेन्सेन ह्वाङको सम्पत्ति सोमबार आधा घण्टाको कारोबारमा ७ अर्ब ४० करोड डलरले घटेको छ। फोर्ब्सको अर्बपतिहरूको वरीयतामा उनी आठौँ स्थानबाट झरेर दसौँ स्थानमा पुगेका छन्।
सम्पत्ति घटेपछि ह्वाङको कुल सम्पत्ति करिब १ खर्ब ५४ अर्ब डलरमा सीमित भएको छ। यससँगै उनी बर्कसायर हाथवेका वारेन बफेट र ओराकलका ल्यारी एलिसनभन्दा पछाडि परेका छन्। सोमबार एनभिडियाको सेयर मूल्य ४ दशमलव ३ प्रतिशतले ओरालो लागेको थियो।
सेयरमा आएको गिरावटसँगै कम्पनीको सञ्चालक समितिले ह्वाङमाथि लागेका आरोपबारे छानबिन थालेको छ। सिङ्गापुरस्थित कम्पनी मेगास्पीडकी पूर्व कार्यकारी एलिस ह्वाङसँगको उनको सम्बन्धलाई लिएर प्रश्न उठेको हो। अमेरिकी अधिकारीहरूले ती कार्यकारी चिनियाँ गुप्तचर निकायसँग जोडिएको निष्कर्ष निकालेका थिए।
ह्वाङले आइतबार आफू पत्नीप्रति बफादार नरहेको स्वीकार गर्दै आफ्ना कामको पूर्ण जिम्मेवारी लिएका छन्। उनले एनभिडियामा कार्यरत छोरी म्याडिसन र छोरा स्पेन्सरसमेतका कर्मचारीलाई पठाएको सन्देशमा आफ्नो व्यवहारले परिवारलाई चोट पुर्याएको उल्लेख गरेका छन्।
अमेरिकी राष्ट्रपति डोनाल्ड ट्रम्पले सङ्घीय अनुसन्धान ब्युरोले यस विषयमा छानबिन गरिरहेको बताएका छन्। यद्यपि उनले ह्वाङ चिन्तित हुनुपर्ने अवस्था नरहेको धारणा व्यक्त गरेका छन्। एनभिडियाले छानबिनका क्रममा ह्वाङ प्रमुख कार्यकारीकै भूमिकामा निरन्तर रहने जनाएको छ।
