नेकपा (एमाले) का अध्यक्ष तथा पूर्वप्रधानमन्त्री केपी शर्मा ओलीले समाजमा बढ्दै गएको घृणा र विध्वंसको प्रवृत्ति छाडेर निर्माण र सकारात्मक सोचतर्फ अघि बढ्न आग्रह गरेका छन्।
सोमबार भक्तपुरमा एमाले जिल्ला कमिटीले बडादशैँ, दीपावली, नेपाल संवत् ११४७ र छठ पर्वको अवसरमा आयोजना गरेको चियापान तथा शुभकामना आदानप्रदान कार्यक्रममा बोल्दै ओलीले कुरा धेरै गर्ने तर काम नगर्ने बानी बदल्नुपर्ने बताए। उनले विध्वंस गर्ने होइन, निर्माण गर्ने मानिस बन्नुपर्नेमा जोड दिए।
ओलीका अनुसार समाजमा लोभ, षड्यन्त्र र छलकपटको प्रवृत्ति बढ्दै गएको छ र त्यसलाई त्याग्नु जरुरी छ। उनले आपसी घृणा र स्वार्थ छाडेर प्रेम, करुणा, इमानदारी र सहकार्यको भावना अँगाल्नुपर्ने बताए।
सभ्य र बस्नलायक समाज बनाउन नागरिकको नैतिक बल, नैतिक भावना र सांस्कृतिक मनोवृत्ति उन्नत हुनुपर्ने ओलीको भनाइ थियो। समाजमा सकारात्मक सोचको विकास भए मात्रै देश अगाडि बढ्ने उनले बताए।
ओलीले चाडपर्वले आपसी सद्भाव र सहकार्यको भावना बलियो बनाउने विश्वास व्यक्त गरे। उनले सबैलाई मिलेर देश निर्माणमा लाग्न आग्रह गर्दै शुभकामना आदानप्रदान कार्यक्रमले एकता र भाइचाराको सन्देश दिने बताए।
