काठमाडौं । अस्ट्रेलियाका पूर्व ओपनर डेभिड वार्नरले सन् २०१८ को स्यान्डपेपर प्रकरणबारे उस्मान ख्वाजाले सार्वजनिक गरेको दाबीलाई पूर्ण समर्थन जनाएका छन् । नेपाल प्रिमियर लिग खेल्न काठमाडौंमा रहेका वार्नरले इन्स्टाग्राममा भिडियो सन्देश जारी गर्दै ख्वाजाको भनाइ शतप्रतिशत सही रहेको बताएका हुन् ।
ख्वाजाले आफ्नो नयाँ पुस्तकमा दक्षिण अफ्रिका भ्रमणका बेला बलको अवस्था परिवर्तन गर्ने योजनाबारे अस्ट्रेलियाको टेस्ट टोलीका सबै सदस्य जानकार रहेको उल्लेख गरेका छन् । उनले ब्याटर, बलर र टोलीका अन्य कर्मचारी सबैलाई त्यसबारे थाहा भएको दाबी गरेका छन् । वार्नरले आठ वर्षपछि यस विषयमा बोल्दै ख्वाजाले सत्य कुरा बाहिर ल्याएको भन्दै उनलाई धन्यवाद दिएका छन् ।
वार्नरले त्यसबेलाको छानबिन प्रक्रियामाथि पनि प्रश्न उठाएका छन् । उनका अनुसार अनुसन्धान हतारमा र अपूर्ण ढंगले गरिएको थियो, र क्यामरन ब्यानक्रफ्टसँगै रहेका ख्वाजाको अन्तर्वार्तासमेत लिइएको थिएन । उनले यो पुराना घाउ कोट्याउने विषय नभई जवाफदेहिता र पारदर्शिताको विषय भएको बताएका छन् ।
तर क्रिकेट अस्ट्रेलियाले ख्वाजाको दाबी अस्वीकार गरेको छ । तीव्र गतिका बलर प्याट कमिन्स, मिचेल स्टार्क, जोस हेजलवुड र नाथन लियोनले संयुक्त वक्तव्य जारी गर्दै न्युल्यान्ड्समा ठूलो पर्दामा ब्यानक्रफ्टले स्यान्डपेपर प्रयोग गरेको दृश्य देखेपछि मात्रै आफूहरूलाई त्यसबारे थाहा भएको बताएका छन् ।
यसैबीच पूर्व प्रशिक्षक ड्यारेन लेहम्यानले टोलीका सबै सदस्यलाई स्यान्डपेपर प्रयोगबारे जानकारी थियो भन्ने आफूलाई नलागेको बताएका छन् । ब्याटर ट्राभिस हेडले भने अब यो प्रकरणबाट अघि बढ्नुपर्ने बताएका छन् भने निक म्याडिन्सनले पुरानो प्रकरण फेरि चर्चामा आउनु दुःखद भएको बताएका छन् ।
सन् २०१८ मा दक्षिण अफ्रिकाविरुद्धको टेस्ट खेलमा बलको अवस्था परिवर्तन गर्न स्यान्डपेपर प्रयोग गरेको घटना सार्वजनिक भएपछि तत्कालीन कप्तान स्टिभ स्मिथ, उपकप्तान वार्नर र ब्यानक्रफ्टमाथि कारबाही भएको थियो । क्रिकेट अस्ट्रेलियाले स्मिथ र वार्नरलाई एक वर्ष तथा ब्यानक्रफ्टलाई नौ महिनाका लागि प्रतिबन्ध लगाएको थियो ।
