कीर्तिपुरस्थित त्रिवि अन्तर्राष्ट्रिय क्रिकेट रंगशालामा शनिबार भइरहेको नेपाल प्रिमियर लिगको खेलमा लुम्बिनी लायन्सका अभिशेष गौतमले एकै ओभरमा दुई विकेट झार्दै काठमाडौँ गोर्खाजलाई दबाबमा पारेका छन्।
लुम्बिनीले टस जितेर पहिले बलिङ गर्ने निर्णय गरेको खेलमा काठमाडौँले ब्याटिङ गरिरहेको थियो। खेलको १६औं ओभरको पहिलो बलमा काठमाडौँका करण केसी तेस्रो विकेटका रूपमा आउट भए। लगत्तै अर्को बलमा विलियम बोसिस्टो खाता नखोली पभेलियन फर्किए। लगातार दुई बलमा दुई विकेट खसेपछि काठमाडौँको इनिङ्समा लय भंग भएको छ र लुम्बिनीले खेलमा आफ्नो पकड बलियो बनाएको छ।
करण केसीको विकेट काठमाडौँका लागि ठूलो धक्का थियो भने बोसिस्टोको शून्य रनमा भएको आउटले टोलीमाथिको दबाब थप बढाएको छ।
आजको खेलमा जित निकाल्दै दुवै टोली प्रतियोगितामा आफ्नो स्थान थप बलियो बनाउने लक्ष्यमा छन्। जारी प्रतियोगितामा चार खेल खेलेको लुम्बिनी तीनमा जित र एकमा अंक बाँडेसँगै सात अंक जोडेर शीर्षस्थानमा रहेको छ। दुई जित र एक हारसहित चार अंक जोडेको काठमाडौँ भने चौथो स्थानमा छ।
यसअघिका एनपीएल संस्करणमा यी दुई टोलीबीच तीन खेल भएका छन्, जसमध्ये लुम्बिनीले एक खेल जित्दा काठमाडौँले दुई खेल आफ्नो पक्षमा पारेको थियो।
