काठमाडौंमा शान्ति सुरक्षा कायम राख्न र आपराधिक गतिविधि नियन्त्रण गर्न प्रहरीले विशेष अभियान सञ्चालन गरेको छ। जिल्ला प्रहरी परिसर काठमाडौंले चलाएको उक्त अभियानमा पछिल्लो चौबीस घण्टामा ७५ जनालाई नियन्त्रणमा लिइएको छ।
प्रहरीका अनुसार नियन्त्रणमा लिइएकामध्ये ६० जना पुरुष, १४ जना महिला र अन्य एक जना छन्। उनीहरूलाई काठमाडौंका विभिन्न स्थानबाट नियन्त्रणमा लिइएको परिसरले जनाएको छ।
परिसरका प्रवक्ता तथा प्रहरी उपरीक्षक दानबहादुर थापाले शान्ति व्यवस्था कायम राख्न र अपराध रोकथाम तथा नियन्त्रण गर्न विशेष प्रहरी परिचालन गरिएको बताए। अभियान सार्वजनिक स्थल, सार्वजनिक यातायात, सरकारी तथा सार्वजनिक सेवा दिने कार्यालय वरपर र भीडभाड हुने स्थानमा केन्द्रित थियो।
प्रहरीले सार्वजनिक स्थल र यातायातमा सेवाग्राही तथा सर्वसाधारणमाथि हातपात गरेको, होहल्ला र भीड सिर्जना गरेको, अभद्र व्यवहार गरेको, चोरी, लुटपाट, बिचौलिया गतिविधि र गुण्डागर्दी गरेको आशंकामा व्यक्तिहरूलाई नियन्त्रणमा लिइएको जनाएको छ।
यसै अभियानमा अदालतबाट विभिन्न मुद्दामा सजाय पाएका आठ जना र अनुसन्धान तथा कानुनी प्रक्रियाका क्रममा फरार रहेका चार जना प्रतिवादी पनि नियन्त्रणमा आएका छन्। पक्राउ परेकाहरूको संलग्नता र उनीहरूमाथि लागेका आरोपबारे थप अनुसन्धान भइरहेको परिसरले जनाएको छ।
अभियानको मुख्य उद्देश्य सार्वजनिक स्थलमा हुने अपराध नियन्त्रण गर्नु, फरार अपराधी खोज्नु र नागरिकलाई सुरक्षित वातावरणमा दैनिकी बिताउन सहयोग गर्नु रहेको प्रहरीले बताएको छ।
