कोशी प्रदेश सरकारले आगामी कात्तिक २५ गतेलाई ‘कोशी प्रदेश भाषा दिवस’का रूपमा घोषणा गरेको छ। प्रदेश सरकारले सोही दिनदेखि सरकारी कामकाजको भाषा ऐन कार्यान्वयनमा ल्याउने निर्णय पनि गरेको छ।
विराटनगरस्थित मुख्यमन्त्री तथा मन्त्रिपरिषद्को कार्यालयमा शुक्रबार बसेको मन्त्रिपरिषद् बैठकले १६औँ राष्ट्रिय विभूति महागुरु फाल्गुनन्दको १४१औँ जन्मजयन्तीको अवसर पारेर कात्तिक २५ गतेदेखि ‘कोशी प्रदेश सरकारी कामकाजको भाषा ऐन’ लागू गर्ने निर्णय गरेको हो।
आन्तरिक मामिला तथा कानुनमन्त्री गोम्बु शेर्पाका अनुसार सोही ऐतिहासिक दिनको उपलक्ष्यमा कोशी प्रदेशमा रहेका नेपाल सरकार, प्रदेश सरकार, स्थानीय तह र सुरक्षा निकायका सम्पूर्ण कार्यालयहरूमा भव्य रूपमा दीपावली गर्ने निर्णय भएको छ। प्रदेश सरकारले सम्पूर्ण राजनीतिक दल, गैरसरकारी संघसंस्था तथा नागरिक समाजलाई समेत उक्त दिन हर्षोल्लासका साथ दीपावली मनाउन आह्वान गरेको छ।
मन्त्रिपरिषद् बैठकले प्रदेश सरकार कार्य विभाजन (पहिलो संशोधन) नियमावली स्वीकृत गरेको छ भने पर्यटकीय पूर्वाधार सञ्चालन, व्यवस्थापन तथा हस्तान्तरण सम्बन्धी कार्यविधिलाई मन्त्रिपरिषद्को आर्थिक, सामाजिक तथा पूर्वाधार समितिमा छलफल गरी पुनः मन्त्रिपरिषद् बैठकमा पेस गर्ने निर्णय गरेको छ।
