खोटाङको हलेसी तुवाचुङ नगरपालिका–३, छ्यास्मिटारस्थित अहालेमा गएराति घरभित्र सुतिरहेका चार जनामाथि खुकुरी प्रहार भएको छ। आक्रमणमा परी तीन जना गम्भीर घाइते भएका छन् भने एक जनाको अवस्था सामान्य रहेको प्रहरीले जनाएको छ।
प्रहरीका अनुसार आक्रमण गर्ने व्यक्ति ४३ वर्षीय नइन्द्रकुमार राई हुन्। उनी सोही वडाको जारबुङका बासिन्दा हुन् र नेपाली सेनामा कार्यरत छन्। दसैँ मनाउन घर आएका बेला श्रीमतीसँग भएको सामान्य घरायसी विवादपछि उनी ससुराली घर पुगेर आक्रमणमा उत्रिएको स्थानीय बासिन्दाको भनाइ छ।
आक्रमणमा उनकी ४० वर्षीया श्रीमती अञ्जना राई, ६२ वर्षीया सासू सेवन्ता राई र २५ वर्षीया साली टेमिना राई गम्भीर घाइते भएका छन्। उनीहरूको टाउकोको पछाडि र हातमा गहिरो चोट लागेको छ। ज्वाइँ नरेन्द्र राईको दाहिने हातमा गहिरो चोट लागे पनि उनको अवस्था सामान्य छ।
चारै जनाको हलेसी तुवाचुङ नगर आधारभूत अस्पताल, धुर्सिममा उपचार भइरहेको छ। गम्भीर घाइते तीन जनालाई थप उपचारका लागि हेलिकप्टरबाट काठमाडौँ लैजाने तयारी भइरहेको जिल्ला प्रहरी कार्यालय, खोटाङका सूचना अधिकारी प्रहरी निरीक्षक निराजन बस्नेतले बताए।
घटनाको करिब १५ मिनेटपछि प्रहरी चौकी छ्यास्मिटारको टोली घटनास्थल पुगेको थियो। त्यतिबेला आक्रमणकारी भागिसकेका थिए, तर खोजतलासपछि उनलाई सोही रात नियन्त्रणमा लिइएको प्रहरीले जनाएको छ। जिल्ला प्रहरी प्रमुख प्रहरी उपरीक्षक प्रकाश बुढाथोकीले घटनाको अनुसन्धान गर्न टोली खटाइएको बताएका छन्। पीडित परिवारले भने आक्रमणकारीले सबैलाई सामूहिक रूपमा मार्ने नियत राखेको आरोप लगाएका छन्। घटनापछि गाउँभर रातभर त्रास फैलिएको स्थानीय बासिन्दाले बताएका छन्।
