गुल्मी — पहिरो खसेपछि गुल्मीको रुद्रबेणी–बुर्तिवाङ सडक पूर्ण रूपमा बन्द भएको छ। सत्यवती गाउँपालिका–४ को खैरेनी नजिकै रहेको बादरेभीरमा सडक माथिबाट लेदो र ठूलो चट्टान खसेपछि सोमबार अपराह्नदेखि नै आवागमन ठप्प छ।
सडकमा खसेको चट्टान निकै ठूलो भएकाले त्यसलाई फुटाउन स्काभेटरसँगै ब्रेकर प्रयोग गर्नुपर्ने अवस्था छ। जिल्ला प्रहरी कार्यालय गुल्मीका सूचना अधिकारी वीरेन्द्रवीर विश्वकर्माका अनुसार चट्टान फुटाएर मात्र सडक खोल्न सकिने भएकाले तत्काल यातायात सुचारु गर्न कठिन छ।
सडक खुलाउन सडक डिभिजन कार्यालय र सत्यवती गाउँपालिकाले निरन्तर काम गरिरहेका छन्। गाउँपालिका अध्यक्ष टीकाराम पाण्डेले आज बिहानैदेखि घटनास्थलमा स्काभेटर र जेसिभी खटाइएको जानकारी दिए। उनका अनुसार ब्रेकरको सहायताले चट्टान फोड्ने काम भइरहेको छ।
चाडपर्वको बेला मुख्य सडक नै बन्द भएपछि उक्त बाटो भएर यात्रा गर्ने सवारीसाधन र यात्रुहरू बिच बाटोमै रोकिन बाध्य भएका छन्।
रुद्रबेणी हुँदै बागलुङको बुर्तिवाङदेखि पूर्वी रुकुमसम्म पुग्ने यो सडक यस क्षेत्रको सबैभन्दा व्यस्त सडकखण्डमध्ये एक हो।
