काठमाडौँ । सरकारले चलचित्र विकास बोर्डको अध्यक्षमा युवा चलचित्रकर्मी मनिष पण्डितलाई नियुक्त गरेको छ । गत असोज ३० गते बसेको मन्त्रिपरिषद् बैठकले उनलाई दुई वर्षका लागि बोर्डको नेतृत्व सुम्पेको हो ।
अध्यक्ष पदका लागि खुला प्रतिस्पर्धामा १२ जनाले आवेदन दिएका थिए । मन्त्रालयको सिफारिस समितिले पण्डितसहित नरेशकुमार पौडेल र अभिनेत्री निशा अधिकारीको नाम मन्त्रिपरिषद्मा पठाएको थियो । तीमध्ये राष्ट्रिय स्वतन्त्र पार्टी निकट मानिने पण्डित छनोटमा परेका हुन् ।
चलचित्र वृत्तमा खासै परिचित अनुहार नभएका पण्डितले ‘जायरा’ मा एसोसिएट निर्माताका रूपमा र ‘ग्याङस्टार ब्लुज’ को निर्माण पक्षमा काम गरेका छन् । निकिता पौडेल अध्यक्ष रहँदा उनले बक्स अफिसको सूचना प्रविधि व्यवस्थापनमा महत्त्वपूर्ण भूमिका खेलेका थिए । अध्यक्ष पदका लागि चाहिने १० वर्षको अनुभव पूरा गरेर उनी नेतृत्वमा पुगेका हुन् ।
नयाँ अध्यक्षसामु सबैभन्दा ठूलो चुनौती प्रतिनिधि सभामा अड्किएको चलचित्र विधेयकलाई टुंगोमा पुर्याउनु रहेको चलचित्रकर्मीहरू बताउँछन् । चलचित्र निर्देशक समाजका निवर्तमान अध्यक्ष जनकदीप पराजुलीका अनुसार विधेयक पारितसँगै त्यसको नियमावली बनाउनु पनि उत्तिकै जरुरी छ । विधेयकमा अध्यक्षको कार्यकाल चार वर्ष बनाउने व्यवस्था छ, जसले पण्डितको कार्यकाल कति रहने भन्ने अन्योल पनि सिर्जना गरेको छ ।
बक्स अफिसमा १० देखि १५ प्रतिशत चलचित्रले मात्र व्यावसायिक सफलता पाउने अवस्थामा वर्षेनी दर्जनौँ फिल्म निर्माण हुने गरेको पराजुलीको भनाइ छ । संख्या धेरै भए पनि गुणस्तरमा कमजोरी रहेको उनको टिप्पणी छ ।
नेपाल चलचित्र कलाकार संघका अध्यक्ष उत्तम केसीले कलाकारको सामाजिक सुरक्षा र व्यवस्थित इनडोर सुटिङ स्टुडियो निर्माणलाई प्राथमिकतामा राख्नुपर्ने बताएका छन् । तर लेखक तथा समीक्षक सामिप्य राज तिमिल्सेनाको मत फरक छ । उनका अनुसार स्टुडियो अभावले फिल्म निर्माण रोकिएको छैन, बरु साउन्ड डिजाइन, ब्याकग्राउन्ड स्कोर र ग्राफिक्सजस्ता विधामा दक्ष जनशक्ति उत्पादन गर्न लगानी गर्नुपर्छ ।
दयाराम दाहालको कार्यकालमा सुरु भएका ‘स्टोरी बोर्ड’ र ‘अन्तर्राष्ट्रिय चलचित्र प्रवर्द्धन समिति’ जस्ता कार्यक्रम पछिल्ला दुई वर्षमा निष्क्रिय बनेको भन्दै तिमिल्सेनाले तिनलाई पुनः सक्रिय बनाउनुपर्ने बताएका छन् । बोर्ड सञ्चार मन्त्रालयअन्तर्गत पर्ने भएकाले मन्त्रालयसँगको समन्वयबिना अध्यक्षले काम गर्न नसक्ने चलचित्रकर्मीहरूको निष्कर्ष छ ।
