चितवन। भूमि व्यवस्था, सहकारी, सङ्घीय मामिला तथा सामान्य प्रशासनमन्त्री प्रतिभा रावलले भूमिहीन, सुकुमबासी र अव्यवस्थित बसोबासीका लागि लालपुर्जा राजनीतिक वाचा नभई उनीहरूको नैसर्गिक अधिकार भएको बताएकी छन्।
सोमबार भरतपुर महानगरपालिका–११ गणेशस्थानमा स्थानीयसँगको छलफलमा मन्त्री रावलले विगतमा लालपुर्जा वितरणलाई राजनीतिक फाइदाका लागि प्रयोग गरिएको उल्लेख गरिन्। लालपुर्जासँग राजनीति जोड्न नहुने उनको भनाइ थियो।
लालपुर्जा वितरणमा देखिएका नीतिगत अड्चन सरकारले अध्यादेशमार्फत हटाइसकेको जानकारी दिँदै उनले अब प्रक्रिया तीव्र पार्न स्थानीय तह र भूमि समस्या समाधान समितिलाई आग्रह गरिन्। अब नीतिले कसैलाई लालपुर्जा दिन रोक्ने अवस्था नरहेको र बाँकी कुरा कार्यान्वयनको इच्छाशक्तिमा निर्भर रहने उनले बताइन्।
ढिलाइका कारण भूमिहीन र सुकुमबासीले लामो समयदेखि कष्ट भोग्नुपरेको उल्लेख गर्दै मन्त्री रावलले उनीहरूलाई चाँडोभन्दा चाँडो लालपुर्जा उपलब्ध गराउन सरकार प्रतिबद्ध रहेको स्पष्ट पारिन्।
छलफलमा स्थानीयले आफ्ना समस्या र गुनासा मन्त्रीसमक्ष राखेका थिए भने पहल थालिएको भन्दै उनीहरूले आभार व्यक्त गरेका थिए। मन्त्री रावलले चितवनका सबै स्थानीय तहमा पुगेर भूमिहीन, सुकुमबासी र अव्यवस्थित बसोबासीका गुनासा सुन्ने र सरोकारवालासँग छलफल गरी तत्काल समाधान गर्ने प्रतिबद्धता व्यक्त गरिन्।
