चीनसँगको सम्बन्ध सुधारमा विशेष भूमिका खेलेका जापानका पूर्वप्रधानमन्त्री यासुओ फुकुदाको ९० वर्षको उमेरमा निधन भएको छ। उनको निधन अक्टोबर २२ मा भएको जापानको सत्तारूढ लिबरल डेमोक्रेटिक पार्टीका एक अधिकारीले एएफपीलाई जानकारी दिएका छन्।
फुकुदाले सन् २००७ को सेप्टेम्बरदेखि करिब एक वर्ष जापानको नेतृत्व सम्हालेका थिए। १२ महिनामै पद छाडेका तत्कालीन प्रधानमन्त्री सिन्जो आबेको स्थानमा उनी प्रधानमन्त्री बनेका थिए। प्रधानमन्त्रीका रूपमा उनले चीनसँगको सम्बन्धलाई मजबुत बनाउने कामलाई उच्च प्राथमिकतामा राखेका थिए।
उनको पहलमा तत्कालीन चिनियाँ राष्ट्रपति हु जिन्ताओले सन् २००८ को मेमा जापानको भ्रमण गरेका थिए। एक दशकको अन्तरालपछि जापान पुग्ने पहिलो चिनियाँ राष्ट्रप्रमुखको त्यो भ्रमणका क्रममा दुवै नेताले साझा रणनीतिक हितमा आधारित पारस्परिक लाभदायक सम्बन्ध निर्माण गर्ने प्रतिबद्धतासहित संयुक्त वक्तव्य जारी गरेका थिए।
समर्थन घट्दै गएपछि फुकुदाले सन् २००८ को सेप्टेम्बरमा प्रधानमन्त्री पदबाट राजीनामा दिएका थिए भने सन् २०१२ मा उनले सक्रिय राजनीतिबाट अवकाश लिएका थिए। विवादित टापु र ऐतिहासिक विषयलाई लिएर दुई देशबीचको सम्बन्ध चिसिँदै गएका बेला उनी सन् २०१४ मा चिनियाँ राष्ट्रपति सी जिनपिङसँग छलफल गर्न चीन गएका थिए। उनको त्यो पहलले सी र आबेबीच शिखर बैठकको बाटो खोलेको थियो।
