तनहुँको दमौलीमा दुई युवाले वैदेशिक रोजगारीको बाटो रोज्नुको साटो आफ्नै ठाउँमा फूलखेती सुरु गरेका छन्। व्यास नगरपालिका–४ सिमलटारका गगनसिंह बस्नेत र लक्ष्य अधिकारीले दुई रोपनी जग्गामा सयपत्री फूल लगाएका हुन्। वैदेशिक रोजगारीमा जाने युवाको सङ्ख्या बढिरहेका बेला उनीहरूले स्वदेशमै केही गर्ने अठोट गरेका हुन्।
तिहार नजिकिँदै गर्दा सिमलटारको खेतमा सयपत्री फूल ढकमक्क फुल्न थालेका छन्। पहेँलपुर फूलले खेतको दृश्य आकर्षक बनेको छ। उनीहरूको लक्ष्य फूल बेचेर आम्दानी गर्नुमा मात्र सीमित छैन। स्थानीय उत्पादनको प्रयोग बढाउने र बाहिरबाट आउने फूलमाथिको निर्भरता घटाउने सन्देश दिनु पनि उनीहरूको उद्देश्य हो।
बस्नेतले कार वास सेन्टरसमेत सञ्चालन गर्दै आएका छन्। खाली रहेको जग्गालाई उपयोगी काममा लगाउने सोचले पहिलोपटक सयपत्री खेती सुरु गरिएको उनले बताए। तिहारजस्ता चाडपर्वमा फूलको माग बढ्ने भए पनि बजारमा बाहिरबाट ल्याइएका फूलको प्रयोग हुने गरेको देखेपछि स्थानीयस्तरमै उत्पादन गर्ने सोच आएको उनको भनाइ छ।
बस्नेतका अनुसार बाहिरबाट फूल आइरहेको देख्दा आफ्नै ठाउँमा पनि फूल उत्पादन गर्न सकिने लागेको थियो। स्थानीयस्तरमै उत्पादन भएको फूल प्रयोग गर्नुपर्ने सन्देश दिन खेती सुरु गरिएको उनले बताए। दुई रोपनी जग्गाको उत्पादन र बजारको माग हेरेर आगामी दिनमा खेती विस्तार गर्ने योजना छ। पहिलो प्रयास सफल भएमा थप जग्गामा सयपत्री लगाउने र त्यसबाट स्थानीयस्तरमा रोजगारी तथा आम्दानीको अवसर सिर्जना हुने उनको अपेक्षा छ।
