नेपाल प्रिमियर लिगको तेस्रो संस्करणमा बिहीबार कीर्तिपुरस्थित त्रिवि अन्तर्राष्ट्रिय क्रिकेट मैदानमा भएको खेलमा लुम्बिनी लायन्सले जनकपुर बोल्ट्ससामु १५० रनको लक्ष्य राखेको छ। टस हारेपछि पहिले ब्याटिङ गर्न पुगेको लुम्बिनीले निर्धारित २० ओभरमा आठ विकेट गुमाउँदै १४९ रन जोडेको थियो।
लुम्बिनीका लागि कप्तान रोहितकुमार पौडेलले सबैभन्दा धेरै ३४ रन बनाए। उनले ३० बलको सामना गर्दै एक छक्का र तीन चौका प्रहार गरे। निरोशन डिकवेलाले २७ बलमा २७ रन जोडे भने दिलिप नाथले १६ बलमा २५ रनको आक्रामक पारी खेले। आशिफ शेखले २१ बलमा २१ रनको योगदान दिए।
जनकपुरको बलिङमा विशाल सुस्लिङ र राहुल यादवले दुई–दुई विकेट लिए। कप्तान हर्मित सिंह, अभिषेक तिवारी र ललित राजवंशीले एक–एक विकेट आफ्नो नाममा लेखाए।
लुम्बिनीले मध्यम खालको योगफल बनाएपछि अब जनकपुरले जितका लागि १५० रन बनाउनुपर्नेछ। लिग चरणको यो भिडन्तमा दुवै टोलीका लागि अंक तालिकामा अघि बढ्ने अवसर छ, त्यसैले दोस्रो पारी रोमाञ्चक हुने अपेक्षा गरिएको छ।
