चितवन — भूमि व्यवस्था, सहकारी, सङ्घीय मामिला तथा सामान्य प्रशासनमन्त्री प्रतिभा रावलले जनताले मन्त्री खोज्दै हिँड्नुपर्ने अवस्थाको अन्त्य हुनुपर्ने बताएकी छन्। मन्त्री आफै जनताको बीचमा पुगेर उनीहरूका समस्या सुन्नुपर्ने उनको भनाइ छ।
भरतपुर विमानस्थलमा पत्रकारसँग कुरा गर्दै मन्त्री रावलले आफू सरकारले गरेका कामबारे सर्वसाधारणलाई जानकारी दिन आएको बताइन्। भूमिहीन नागरिक र सहकारी पीडितको विषयमा सरकारले के-के काम गरेको छ भन्ने जानकारी गराउनु आफ्नो भ्रमणको उद्देश्य रहेको उनले स्पष्ट पारिन्।
सरकारको पहिलो प्राथमिकता भूमिहीन नागरिक र सहकारी पीडितको समस्या समाधान गर्नु रहेको मन्त्री रावलले बताइन्। समस्याग्रस्त सहकारीको बचत फिर्ता गर्ने प्रक्रिया सुरु भइसकेको र त्यसलाई अझ तीव्र बनाइने उनको भनाइ छ। लामो समयदेखि पीडामा रहेका बचतकर्ताको रकम छिटोभन्दा छिटो फिर्ता गर्नुपर्ने उनले बताइन्।
बचतकर्ताको रकम नफर्काएका सहकारीलाई ताकेता गरिने मन्त्री रावलले बताइन्। सरकारले जनताको हितमा के काम गरिरहेको छ र आगामी कार्ययोजना के हो भन्नेबारे सर्वसाधारणलाई जानकारी गराउनुपर्ने उनको भनाइ छ।
लामो समयदेखि बसोबास गर्दै आएको ठाउँबाट उठ्नुपर्ने हो कि भन्ने चिन्ता पनि सम्बोधन गर्नुपर्ने उनले बताइन्। त्यस्तो नहुने भन्दै उनले कानुनी जटिलता हटाएर सरकार अघि बढेको र बसोबास गरिरहेको स्थानकै जग्गाको धनीपुर्जा उपलब्ध गराइने बताइन्। आवश्यक नीतिगत सुधार भइसकेको र कार्यान्वयनका क्रममा देखिने अड्चनलाई पनि सुधार गर्दै सरकार अघि बढ्ने उनको भनाइ छ।
