मुम्बई । भारत र अमेरिकाबिच लामो समयदेखि छलफलमा रहेको द्विपक्षीय व्यापार सम्झौता अन्तिम चरणमा पुगेको छ। मुम्बईमा मङ्गलबार भारतीय विदेशमन्त्री एस जयशङ्कर र अमेरिकी विदेशमन्त्री मार्को रुबियोबिचको भेटवार्तामा दुई देशले व्यापार, रक्षा, प्रविधि र ऊर्जा सुरक्षाका क्षेत्रमा सहकार्य थप विस्तार गर्ने प्रतिबद्धता जनाएका छन्।
वार्तापछि रुबियोले सम्झौताका केही प्राविधिक विषय मात्र टुङ्ग्याउन बाँकी रहेको बताए। सम्झौताका सम्पूर्ण विवरणमा सहमति बनेपछि मात्र औपचारिक घोषणा गर्नुपर्नेमा उनले जोड दिएका थिए। भारतीय विदेश मन्त्रालयका अनुसार भेटवार्तामा दुई देशको द्विपक्षीय सम्बन्धसँगै क्षेत्रीय र विश्वव्यापी घटनाक्रमबारे पनि छलफल भएको थियो।
रुबियोले भारत र अमेरिकाबिच प्रमुख राष्ट्रिय स्वार्थका विषयमा बलियो तालमेल रहेको उल्लेख गर्दै कूटनीतिक र आर्थिक साझेदारी अझ गहिरो बनाउनुपर्ने धारणा राखे। मुम्बईलाई भारतको आर्थिक मुटुका रूपमा चिनाउँदै उनले त्यहाँबाट व्यापार र लगानी विस्तारको उल्लेख्य सम्भावना रहेको बताए।
भारतको औपचारिक भ्रमणमा रहेका रुबियोले गुजरातको जामनगरमा उन्नत ऊर्जा सहकार्यबारे छलफल गर्ने कार्यक्रम रहेको छ। विश्लेषकहरूले यस भ्रमणले दुई देशको रणनीतिक साझेदारी थप बलियो बनाउने अपेक्षा गरेका छन्।
