चितवन — दसैँको टीकाको दिन आज लाखौँ परिवार एकै छानामुनि भेला भइरहँदा कतिपय नेपाली भने परिवारबाट टाढै बसेर चाड मनाइरहेका छन्। कामको व्यस्तता र घरबाट टाढा हुनुले उनीहरूलाई परिवारसँग बसेर टीका थाप्ने अवसर मिलेको छैन।
अत्यावश्यक सेवा दिने कर्मचारीहरूले विदा नपाएकाले दसैँ परिवारसँग मनाउन पाएका छैनन्। स्वास्थ्य र सुरक्षाक्षेत्रमा खटिएकाहरू यही समूहमा पर्छन्। चितवनका प्रहरी प्रमुख प्रहरी उपरीक्षक रामेश्वर पौडेलका अनुसार करिब ९० प्रतिशत प्रहरीले घर गएर टीका थाप्न पाउँदैनन्। उनले भने, “सर्वसाधारणले सुरक्षित रूपमा चाड मनाउन सकून् भनेर हामी परिवारसँग टीका लगाउन पाउँदैनौँ। यो वर्षौं वर्षदेखिको निरन्तरता हो।” सेना, सशस्त्र प्रहरी र राष्ट्रिय अनुसन्धानका कर्मचारीको पनि अवस्था यस्तै छ। निजी सुरक्षा गार्डहरूलाई समेत विदा मिल्दैन — गढी सेक्युरिटीका सञ्चालक अश्विन गोलेका अनुसार चाडपर्वमा उद्योग व्यवसाय बन्द हुँदा सुरक्षाको जिम्मा गार्डकै काँधमा पर्छ र थप जनशक्तिको माग हुन्छ।
भरतपुर अस्पतालका मेडिकल सुपरिटेण्डेन्ट डा. विश्वबन्धु बगालेका अनुसार ३० प्रतिशत चिकित्सक, नर्स र स्वास्थ्यकर्मी अस्पतालमै बस्नुपर्छ। बहिरङ्ग सेवा बन्द रहे पनि आकस्मिक र अन्तरङ्ग सेवा चल्ने भएकाले उनीहरूले विदा लिन पाउँदैनन् र दसैँ–तिहार आलोपालो गरेर मनाउँछन्। नेपाल नर्सिङ सङ्घ चितवनका अध्यक्ष विष्णु अधिकारीका अनुसार ५० प्रतिशत नर्सले दसैँमा विदा पाउँदैनन्।
विदेशमा रहेका अधिकांश नेपालीले पनि परिवारसँग टीका लगाउन पाएका छैनन्। चार वर्षपछि बुबाआमाको हातबाट टीका थाप्न रत्ननगर आएका विष्णु पौडेल भन्छन्, “परिवारसँग पर्व मनाउन पाउनु ठूलो खुसी हो।”
