काठमाडौँ । नेपाल घुम्न आएका विदेशी पर्यटकले यसपालिको बडादसैँ टीका–जमरा लगाएर मनाएका छन् । ठमेलस्थित काठमाडौँ इको होटलमा आयोजित विशेष कार्यक्रममा उनीहरूले नेपाली परम्पराअनुसार रातो टीका थापे, जमरा लगाए र एक–अर्कासँग दसैँको खुसी साटासाट गरे ।
नेपालीको महान् चाड बडादसैँको अवसरमा होटलले विदेशी पाहुनाका लागि टीका–जमराको कार्यक्रम आयोजना गरेको हो । उनीहरूले नेपाली संस्कारअनुसार दसैँ मनाउँदा नेपाली संस्कृतिलाई नजिकबाट बुझ्ने अवसर पाएका थिए । कार्यक्रममा सहभागी पर्यटकमा नेपाली परम्पराप्रति गहिरो उत्साह र जिज्ञासा देखिएको थियो ।
नेपाल पर्यटन बोर्ड सञ्चालक समितिका सदस्य तथा होटलका सञ्चालक सहदेव धमलाका अनुसार यस्ता कार्यक्रमले नेपालको सांस्कृतिक विविधता, मौलिक परम्परा र आतिथ्य सत्कारलाई अन्तर्राष्ट्रियस्तरमा प्रवर्द्धन गर्न सहयोग पुग्छ । विदेशी पर्यटकले नेपाली चाडपर्वमा सहभागिता जनाउँदा उनीहरूमा नेपालप्रतिको लगाव पनि बढ्ने उनको भनाइ छ ।
ठमेल पर्यटन विकास परिषद्का महासचिव पशुपति कँडेलले दसैँ जस्ता चाडपर्वले नेपाली र विदेशीबिच आपसी सद्भाव, मित्रता र सांस्कृतिक सम्बन्धलाई थप प्रगाढ बनाउने बताए । धार्मिक, सांस्कृतिक र प्राकृतिक सौन्दर्यले आकर्षित भएर नेपाल आउने धेरै विदेशी पर्यटक पछिल्ला वर्षहरूमा नेपाली संस्कारअनुसारका पर्व र उत्सव मनाउने क्रम बढ्दो छ ।
