एथेन्स। जीवनयापनको लागत आकासिएपछि ग्रीसका हजारौँ विद्यार्थी र शिक्षक बुधबार सडकमा उत्रिएका छन्। राजधानी एथेन्समा आयोजित विशाल जुलुसमा सहभागीहरूले विद्यार्थीका लागि सस्तो आवासको व्यवस्था गर्न, शिक्षामा सरकारी लगानी बढाउन र बढ्दो महँगी नियन्त्रण गर्न सरकारसँग माग गरेका छन्।
प्रदर्शन एथेन्समा मात्र सीमित रहेन। उत्तरतर्फको थेसालोनिकी र पश्चिमी बन्दरगाह सहर पात्रासमा पनि विद्यार्थी र शिक्षकले जुलुस निकालेका थिए। प्रदर्शनकारीहरूका अनुसार इन्धनको चर्को मूल्य, महँगो घरभाडा, विद्यालयहरूको जीर्ण अवस्था र शिक्षातर्फको अपर्याप्त बजेटले आक्रोश चुलिएको हो।
जुलुसमा ‘ग्रीसदेखि फ्रान्ससम्म, शिक्षामा लगानी बढाऊ’ लेखिएका ब्यानर देखिन्थे भने केहीले ‘पढ्ने कि जीवित रहने ?’ भन्ने प्लेकार्ड बोकेका थिए। फ्रान्स, इटाली र अल्बानियामा पनि यस्तै प्रदर्शन भइरहेका छन्, जसमध्ये केही स्थानमा झडपसमेत भएको छ।
२० वर्षीय इन्जिनियरिङ विद्यार्थी पानागियोटिस मोस्कोनासले सरकारले घोषणा गरेको मासिक १२० युरोको भाडा अनुदान आधा भाडा तिर्न पनि अपुग हुने र त्यो रकम वर्षको अन्त्यमा मात्र पाउने बताए। शिक्षक इओनिस रोम्पसले परिवारको खर्च धान्नै मुस्किल हुँदै गएको र विद्यालयको अवस्था प्रत्येक वर्ष खस्कँदै गएको गुनासो गरे।
यसैदिन शिक्षकहरूले हडताल गरेका थिए, जसले केही विद्यालयको पठनपाठन प्रभावित बन्यो भने केही विद्यालय खुला रहे। सम्भावित झडपलाई मध्यनजर गर्दै दङ्गा नियन्त्रण प्रहरी परिचालन गरिएको थियो र जुलुस मार्गका पसल तथा क्याफेहरूले स्टिलका सटर लगाएका थिए।
