काबुल। गम्भीर खडेरीसँग जुधिरहेको अफगानिस्तानको उत्तरी बागलान प्रान्तमा १० वटा खानेपानी आपूर्ति सञ्जाल सञ्चालनमा ल्याइएको छ। पानीको अभावसँग जुधिरहेका स्थानीय बासिन्दाको स्वच्छ पानीमा पहुँच बढाउन ती सञ्जाल सञ्चालनमा ल्याइएका हुन्।
अफगानिस्तानको ग्रामीण पुनःस्थापना तथा विकास मन्त्रालयले बुधबार उक्त जानकारी दिएको हो। मन्त्रालयका अनुसार नयाँ सञ्जाल सञ्चालनमा आएसँगै बागलानका बासिन्दालाई सुरक्षित खानेपानी उपलब्ध गराउन ठूलो सहयोग पुग्नेछ।
भूपरिवेष्टित मुलुक अफगानिस्तान पछिल्लो समय चरम खडेरीको समस्याबाट गुज्रिरहेको छ। पानीको हाहाकारले स्थानीय बासिन्दाको दैनिक जीवन गम्भीर रुपमा प्रभावित भइरहेका बेला सरकारले खानेपानीको उपलब्धता बढाउने विभिन्न योजना अघि सारिरहेको छ।
पानीको सङ्कट टार्न अफगान सरकारले साना तथा ठूला बाँध निर्माण, खानेपानी आपूर्ति प्रणालीको विस्तार तथा सिँचाइ र पानी आपूर्तिका लागि नहर निर्माणजस्ता काम अघि बढाइरहेको छ। बागलानमा सञ्चालनमा आएका नयाँ सञ्जालले स्वच्छ पानीको उपलब्धता बढाएर खडेरीबाट उत्पन्न समस्या कम गर्न सहयोग पुग्ने अपेक्षा गरिएको छ।
