बर्लिन — जर्मनीमा रुसका लागि जासुसी गरेको आशङ्कामा एक युक्रेनी नागरिकलाई प्रहरीले नियन्त्रणमा लिएको छ। जर्मनीका सङ्घीय अभियोजक कार्यालयका अनुसार ती व्यक्तिमाथि सैन्य दृष्टिले महत्त्वपूर्ण रहेका सूचना र दस्तावेज सङ्कलन गरेको आरोप लागेको हो।
‘भादिम वाई’ भनेर चिनाइएका ती पुरुषले बख्तरबन्द सवारीसाधन, गोला-बारुद तथा विस्फोटक पदार्थ उत्पादनबारे विवरण बटुलेको र नेटोको पूर्वी क्षेत्रमा रहेका सैन्य संरचना र जनशक्तिबारे जानकारी हात पार्न खोजेको अभियोजकहरूको दाबी छ। जर्मनीको आन्तरिक गुप्तचर संस्था बीएफभीबाट आएको सूचनाका आधारमा सङ्घीय आपराधिक प्रहरीले उनलाई बर्लिनको पूर्वतिर पर्ने ब्रान्डेनबर्ग राज्यको ओडर-स्प्री जिल्लाबाट पक्राउ गरेको हो।
अभियोजकहरूका अनुसार उनी कम्तीमा सन् २०२५ को जुलाईसम्म बिचौलियामार्फत रुसी गुप्तचर निकायसँग सम्पर्कमा रहेका थिए। सार्वजनिक रूपमै उपलब्ध सूचनाका अतिरिक्त युरोपका रक्षा उद्योगका व्यक्तिहरूबाट गोप्य विवरण निकाल्ने प्रयाससमेत उनले गरेको आरोप छ।
जर्मन साप्ताहिक ‘डेर स्पीगेल’ले जनाएअनुसार ५३ वर्षीय ती व्यक्ति पूर्वी जर्मनीको आइजेनहुटेनस्टाडमा बस्दै आएका थिए। अनुसन्धानकर्ताहरूले उनको सम्भावित सम्बन्ध रुसी सैन्य गुप्तचर संस्था जीआरयूसँग रहेको अनुमान गरेका छन्।
रुसविरुद्धको युद्धमा युक्रेनलाई साथ दिने प्रमुख मुलुकमध्ये जर्मनी पनि पर्छ। बर्लिनले मस्कोले आफूविरुद्ध जासुसी, तोडफोड र अन्य अस्थिरता सिर्जना गर्ने कार्य गरिरहेको आरोप लगाउँदै आएको छ, जसलाई रुसले भने लगातार अस्वीकार गर्दै आएको छ।
जर्मन चान्सलर फ्रेडरिक मेर्जले बिहीबार गिरफ्तारीलाई सफल कारबाही भन्दै जर्मनी रुसी गुप्तचर गतिविधिको निशानामा भएकाले यस्ता घटनाका लागि सधैँ तयार रहनुपर्ने धारणा राखे।
