नेपाल प्रिमियर लिग (एनपीएल) को तेस्रो संस्करणमा चितवन राइनोजले उपाधि जित्ने लक्ष्यसहित तयारी गरिरहेको छ । चितवनमा आयोजित पत्रकार सम्मेलनमा अध्यक्ष आयुष न्यौपानेले सन्तुलित र व्यवस्थित टोली बनाएको बताए । यसअघिका दुई संस्करणको तुलनामा यसपटक खेलाडी छनोटमा टोलीले उदार खर्च गरेको उनको दाबी छ ।पहिलो संस्करणमा अप्रत्याशित रूपमा प्लेअफसम्म पुगेको राइनोज दोस्रो संस्करणमा भने लिग चरणबाटै बाहिरिएको थियो । त्यो विगत बिर्सिएर नयाँ इतिहास बनाउने अठोट टोलीको छ । युवा अलराउण्डर कुशल मल्लको कप्तानीमा टोलीले हेटौँडाको गौरीटारमा एक महिनादेखि क्लोज क्याम्प राखेर तालिम लिइरहेको छ ।यसपटक राइनोजको ब्याटिङको केन्द्र इंग्ल्यान्डका अनुभवी रवि बोपरा हुन् । उनले पहिलो संस्करणमा २८६ र दोस्रोमा २३७ रन बनाएका थिए । उनलाई जिम्बाबेका कप्तान सिकन्दर राजाले साथ दिनेछन्, जसले इन्डियन प्रिमियर लिग, पाकिस्तान सुपर लिग र क्यारेबियन प्रिमियर लिगमा खेलेको अनुभव राख्छन् । पाकिस्तानी लेग-स्पिनर उसामा मिर र क्यानडाका बायाँहाते तीव्र गतिका बलर कलिम सना पनि टोलीमा छन् ।नेपाली युवा खेलाडी देव खनाल र विकेटकिपर ब्याटर अर्जुन साउदलाई ओपनिङ जोडीका रूपमा उतार्ने सम्भावना छ । देवले आईसीसी लिग–२ मा ओमानविरुद्ध राम्रो प्रदर्शन गरेका थिए । यस्तै, रिजन ढकाल, कमल सिंह ऐरी, विवेक यादव, रञ्जित कुमार र दीपक बोहोरा पनि टोलीमा छन् ।कोचको जिम्मेवारी यसपटक पाकिस्तानी बलर सोहेल तनवीरलाई दिइएको छ । अघिल्ला दुई संस्करणमा राइनोजको बलिङ कमाण्ड सम्हालेका तनवीर टोलीका खेलाडीका सबल र कमजोर पक्ष राम्ररी बुझ्ने भएकाले उनैलाई रोजिएको प्रमुख कार्यकारी अधिकृत प्रताप देवकोटाले बताए ।राइनोजले लिग चरणमा ७ खेल खेल्नेछ । पहिलो खेल कार्तिक १० गते विराटनगर किङ्ससँग हुनेछ । टोलीले एलिमिनेटर नखेली सिधै फाइनल पुग्ने लक्ष्य राखेको छ । खेल हेर्न चितवनबाट कीर्तिपुरसम्म जाने दर्शकका लागि टोलीले निःशुल्क बस सेवा दिनेछ, जसका लागि खेलको टिकट र टोलीको जर्सी अनिवार्य गरिएको छ ।