बिहीबार सार्वजनिक भएको संसदीय प्रतिवेदनले रणनीतिक रूपले संवेदनशील आर्कटिक क्षेत्रको सुदूर उत्तरमा रूसको सैन्य उपस्थितिसँग जुध्न बेलायतसँग आवश्यक नौसैनिक क्षमता नरहेको चेतावनी दिएको छ । प्रतिवेदनमा आर्कटिक र उत्तरी एट्लान्टिकका केही भाग समेट्ने ‘हाई नर्थ’ क्षेत्र बेलायतको रक्षा र सुरक्षाका निम्ति अझै महत्वपूर्ण हुँदै गएको उल्लेख छ । जलवायु परिवर्तनका कारण हिउँ पग्लिँदै जाँदा उक्त क्षेत्रमा पहुँच सहज बनेको छ, अनि रूसले त्यही ठाउँमा आफ्ना आणविक पनडुब्बी तैनाथ गर्दै आएको छ ।
रूसी सैन्य गतिविधि बेलायती जलक्षेत्रसम्मै फैलिन सक्ने भन्दै सांसदहरूले समुद्रमुनिका ऊर्जा पाइपलाइन र डेटा केबलजस्ता महत्वपूर्ण संरचनामाथिको ‘हाइब्रिड खतरा’ बढेको बताएका छन् । बेलायती अखबार द डेली टेलिग्राफले ढुवानी तथ्याङ्कको निगरानी गर्दा रूसी माछा मार्ने ट्रलरहरू महत्वपूर्ण ट्रान्सएट्लान्टिक केबलमाथिको क्षेत्रमा सयौँ घण्टा बसेको पाएको थियो ।
रूसी पनडुब्बी र समुद्रमुनिका पूर्वाधारमा हुन सक्ने तोडफोडसँग जुध्न बेलायतसँग पर्याप्त पनडुब्बीविरोधी फ्रिगेट र उभयचर युद्धपोत हुनुपर्ने प्रतिवेदनले उल्लेख गरेको छ, तर यी क्षमतामा बेलायत कमजोर रहेको सांसदहरूको निष्कर्ष छ । समुद्री बरफमुनि सञ्चालन गर्न सक्ने पनडुब्बीको अभाव, फ्रिगेट र आणविक पनडुब्बी पुराना हुँदै गएको तथा मर्मतसम्भारका समस्याहरू पनि प्रतिवेदनमा उल्लेख छन् ।
उत्तरी क्षेत्र र बाल्टिक सागरको सुरक्षाका लागि बेलायतले १० नाटो सदस्य राष्ट्र सम्मिलित गठबन्धनको नेतृत्व गरिरहेको छ । तर प्रभावकारी नेतृत्वका लागि नौसैनिक क्षमताका स्पष्ट कमजोरी तत्काल सम्बोधन गर्नुपर्ने संसदीय रक्षा समितिले जनाएको छ । सांसदहरूले सन् २०३० सम्म जहाजको उपलब्धता सुधार गर्ने स्पष्ट योजना मागेका छन् । यता, युरोपेली सङ्घले आर्कटिकमा निगरानी बढाउने योजना सार्वजनिक गरेको छ भने बेलायती सरकारले समुद्रमुनिका पूर्वाधारसम्बन्धी करिब १४० वर्ष पुरानो कानुन अद्यावधिक गर्ने प्रस्ताव अघि सारेको छ ।
