काठमाडौँ। विजया दशमीको टीका, जमरा र आशीर्वाद ग्रहण गर्न मान्यजनकहाँ आउजाउ गर्ने सर्वसाधारणको भिड बढेसँगै काठमाडौँ उपत्यकाका सडकहरूमा सवारी साधनको चाप उल्लेख्य रुपमा बढेको छ।
टीकाको शुभसाइतसँगै सडकमा सवारी साधन थपिएका हुन्। फूलपाती, अष्टमी र नवमीका दिनको तुलनामा आज सडकमा गाडीहरू बढी देखिएका छन्। सार्वजनिक यातायातमा यात्रुहरूको सङ्ख्या बढेर केही ठाउँमा भीडभाडसमेत देखिएको छ।
काठमाडौँ उपत्यका ट्राफिक प्रहरी कार्यालय रामशाहपथका ट्राफिक प्रहरी उपरीक्षक नरेशराज सुवेदीका अनुसार उपत्यका भित्रिने प्रमुख नाकासँगै काठमाडौँ, भक्तपुर र ललितपुरका मुख्य सडकहरूमा सवारी साधन सामान्य रुपमा चलिरहेका छन्। “टीकाका दिन आफन्तकहाँ आउने–जानेको सङ्ख्या उल्लेख्य बढेकाले गत दुई–तीन दिनको तुलनामा आज सडकमा सवारी साधन बाक्लो देखिएको हो,” उनले बताए।
ट्राफिक व्यवस्थापनलाई प्रभावकारी बनाउन ट्राफिक प्रहरीलाई योजनाबद्ध रुपमा परिचालन गरिएको छ। सम्भावित क्षेत्रमा निगरानीसँगै ट्राफिक नियम पालना गराउन नियमित जाँच भइरहेको प्रहरीको भनाइ छ।
दसैँ मनाउन गाउँघर गएका सर्वसाधारण पेसा–व्यवसायका सिलसिलामा आजैदेखि काठमाडौँ फर्किन थालेका छन्। नेपाल प्रहरीसँगको समन्वयमा यात्रु सुरक्षाका लागि सवारी साधनको यान्त्रिक परीक्षण, तीव्र गतिको अनुगमन र चालकले मादक पदार्थ वा लागु औषध सेवन गरे–नगरेको परीक्षणलाई निरन्तरता दिइएको सुवेदीले जानकारी दिए।
ट्राफिक प्रहरीको सक्रियताले सडक दुर्घटना र मानवीय क्षति घटेको उनको भनाइ छ। दसैँपछि काठमाडौँ फर्कने यात्रुको चाप बढ्ने भएकाले प्रमुख नाका र राजमार्गमा सोही अनुसारको व्यवस्थापन गरिने प्रहरीले जनाएको छ। सुरक्षा निकायको अनुमानअनुसार दसैँका अवसरमा उपत्यकाबाट करिब दश लाख नागरिक बाहिरिएका थिए।
