तिहारलाई लक्षित गरेर पोखरा महानगरपालिकाले सयपत्री फूलको बिक्रीवितरणका लागि स्थान र मूल्य निर्धारण गरेको छ। आगामी आइतबारदेखि लागू हुने व्यवस्थाअनुसार सयपत्री फूल प्रतिकिलो पाँच सय रुपैयाँ र प्रतिमाला दुई सय रुपैयाँमा बिक्री हुनेछ।
महानगरको आर्थिक विकास महाशाखाका प्रमुख मनोहर कडरियाका अनुसार फूल बिक्रीका लागि पोखराभर १७ ठाउँ तोकिएका छन्। तीमध्ये देवी पञ्चाङ्ग ज्येष्ठ नागरिक मिलन केन्द्र, टुँडीखेलको पुरानो वडा कार्यालय, सङ्गमचोक कृषि बजार चौतारी, महेन्द्रपुलको फल्चा, पृथ्वीचोकको पोखरा कोशेली घर, पोखरा रङ्गशाला र विभिन्न वडाका किसान बजार तथा कार्यालय परिसर पर्छन्।
सरकारी पक्षको समन्वयमा बिक्रीस्थल र फूलको गुणस्तर हेरेर मूल्य तय गरिएको कडरियाले बताए। स्थानीय उत्पादनलाई प्रोत्साहन दिन महानगरले तिहारमा प्लास्टिकजन्य फूलको माला बिक्री नगर्न व्यवसायीलाई आग्रहसमेत गरेको छ।
फ्लोरिकल्चर एसोसिएसन नेपाल, कास्कीमा आबद्ध ४२ वटा नर्सरी तथा पुष्प व्यवसायीले पोखरामा फूल उत्पादन र बिक्री गर्दै आएका छन्। एसोसिएसनले तिहारको पूर्वसन्ध्यामा पोखरामा नवौँ गोदावरी पुष्प प्रदर्शनी तथा तेस्रो सयपत्री पुष्प मेला पनि आयोजना गरेको छ। बुधबारदेखि सुरु भएको प्रदर्शनीमा फूलका २२, कृषि सामग्रीका तीन र सूचनामूलक एउटा गरी २६ वटा प्रदर्शनीकक्ष रहेका छन्। प्रदर्शनीले उत्पादक किसान, व्यवसायी र उपभोक्तालाई एउटै ठाउँमा ल्याएको एसोसिएसनका अध्यक्ष रामप्रसाद सुवेदीले बताए।
