काठमाडौँ — चाडपर्वको बेला कुनै पनि अवाञ्छित गतिविधि हुन नदिन प्रहरीले विशेष सुरक्षा योजना अपनाएर थप सक्रिय भएर काम गर्नुपर्ने प्रहरी महानिरीक्षक डा. मनोजकुमार केसीले बताएका छन्।
नेपाल प्रहरी प्रधान कार्यालयबाट भर्चुअल माध्यममा दीपावली, नेपाल संवत् र छठलगायत पर्वका बेला अपनाउनुपर्ने सुरक्षा संवेदनशीलताबारे प्रहरी कर्मचारीलाई निर्देशन दिँदै उनले चाडपर्वमा हुनसक्ने लुटपाट र चोरीजस्ता आपराधिक घटना समयमै सम्बोधन गर्न प्रहरी प्रभावकारी रूपमा परिचालन हुनुपर्नेमा जोड दिए।
महानिरीक्षक केसीले पटकाजस्ता विष्फोटक पदार्थको कारोबार नियन्त्रण गर्नुका साथै सामाजिक सद्भावमा खलल पार्न सक्ने कुनै पनि घटनाप्रति थप सचेत भएर काम गर्न निर्देशन दिए। आ-आफ्नो क्षेत्रमा सुरक्षा व्यवस्थापनका लागि आवश्यक योजना बनाउनुका साथै स्थानीय तह र सरोकार भएका सबै पक्षसँग समन्वय र सहकार्य गरेर व्यावसायिक, उत्तरदायी र जवाफदेही प्रहरी सेवा दिनुपर्ने उनको भनाइ थियो।
प्रदेश र जिल्ला प्रहरी प्रमुखहरूले आफ्नो क्षेत्रको अनुगमन, सुपरीवेक्षण र निरीक्षण गरी देखिएका कमी कमजोरी र त्रुटि समयमै सच्याउनुपर्नेमा पनि उनले जोड दिए।
कार्यक्रममा प्रहरी अतिरिक्त महानिरीक्षकहरू र वरिष्ठ प्रहरी अधिकृतहरूसहित सातवटै प्रदेश प्रहरी कार्यालय, राजमार्ग सुरक्षा तथा ट्राफिक व्यवस्थापन कार्यालय, प्रदेश प्रहरी तालिम केन्द्र, विशेष सुरक्षा गण र जिल्ला प्रहरी कार्यालयका प्रमुख तथा प्रतिनिधिहरू भर्चुअल रूपमा सहभागी थिए।
