हुम्लाबाट सुर्खेत पुग्न यात्रुले तीन दिन लगाउनुपर्ने अवस्था छ। कर्णाली करिडोरको सडक जीर्ण भएकाले वर्षा होस् वा घाम, जुनसुकै बेला पहिरो खस्ने जोखिमसँगै यात्रा गर्नुपर्ने बाध्यता छ।
सर्केगाड गाउँपालिका–१ जैरका नवराज रावतले तीन दिन लगाएर हुम्ला–सुर्खेत यात्रा पूरा गरेपछि सडकको अवस्थाप्रति आक्रोश व्यक्त गरेका छन्। वर्षौंदेखि सडक निर्माण र स्तरोन्नतिका नाममा बजेट खर्च भए पनि सुरक्षित यात्रा गर्न नपाएको उनको गुनासो छ।
नेपालगन्जको जमुनाहादेखि चीनको सीमावर्ती हिल्सासम्म जोडिने कर्णाली करिडोर हुम्लालाई राष्ट्रिय सडक सञ्जालसँग जोड्ने महत्वपूर्ण मार्ग हो। तर सडकको दयनीय अवस्थाले यात्रु र मालसामान ढुवानीमा समस्या भइरहेको छ।
सर्केगाड–१ खच्चामा होटल व्यवसाय गर्दै आएका डिलबहादुर कार्कीले सडक स्तरोन्नति नहुँदा यात्रुले सास्ती भोग्नुपरेको बताए। स्थानीय नवराज महताराले कबाडी–सलिसल्ला सडकखण्डको जोखिमपूर्ण अवस्थाप्रति चिन्ता व्यक्त गरे। सडकको अवस्थाले खाद्यान्न र दैनिक उपभोग्य वस्तुको ढुवानी, स्वास्थ्य उपचार र आपतकालीन आवतजावतमा समेत कठिनाइ भइरहेको स्थानीयको भनाइ छ।
जोखिमपूर्ण ठाउँमा बनाइएका काठे तटबन्धलगायत संरचनाको गुणस्तर र खर्च भएको बजेटको प्रभावकारितामाथि पनि प्रश्न उठेको छ। स्थानीयले सडकको नियमित मर्मतसम्भार, पहिरोको जोखिम न्यूनीकरण र स्तरोन्नतिका लागि प्रभावकारी कदम चाल्न सङ्घीय र प्रदेश सरकारसँग माग गरेका छन्।
