दसैँ सकिएसँगै हिमाली जिल्ला मुस्ताङमा पर्यटकको आगमन फेरि बढ्न थालेको छ। बेनी–जोमसोम सडकमार्ग सञ्चालनमा आएपछि यही बिहीबार र शुक्रबार गरी दुई दिनमै सात हजार आठ सय ४६ जना पर्यटक मुस्ताङ भित्रिएका छन्। जिल्ला प्रहरी कार्यालय मुस्ताङको तथ्याङ्कअनुसार बिहीबार तीन हजार ३३ र शुक्रबार चार हजार आठ सय १३ जना स्वदेशी तथा विदेशी पर्यटक जिल्लामा पुगेका हुन्।
दसैँअघि मुस्ताङ लगभग सुनसान जस्तै बनेको थियो। रसुवाको भोटेकोशीमा आएको बाढी र असोज ११ गतेको भारी वर्षापछि आएको बाढी तथा पहिरोले बेनी–जोमसोम सडक पूर्ण रूपमा अवरुद्ध भएको थियो, जसले पर्यटक आगमन ठप्प भएको थियो। सडक खुलेपछि भने दैनिक आगमनको औसत क्रमशः उकालो लागिरहेको प्रहरी निरीक्षक ईश्वर महतले बताएका छन्।
यस वर्ष घटस्थापनादेखि विजया दशमीसम्मको १० दिनमा बेनी–जोमसोम मार्गबाट पाँच हजार छ सय ६३ पर्यटक मुस्ताङ पुगेका थिए। तीमध्ये चार हजार चार सय नौ जना अर्थात् ७७ दशमलव ८५ प्रतिशत विदेशी थिए। चालु वर्षको साउनमा ३० हजार पाँच सय ३४, भदौमा २० हजार दुई सय ६८ र असोजमा १८ हजार छ सय एक पर्यटक मुस्ताङ भित्रिएका थिए।
दसैँ–तिहार र छठसम्म पर्यटकको उपस्थिति अझ बढ्ने पर्यटन व्यवसायीहरूको अपेक्षा छ। मुक्तिनाथ मन्दिरको दर्शनदेखि लोमान्थाङ दरबार, कोरलानाका, ढुम्बाताल र टिटी तालसम्मका दर्जनौँ गन्तव्यले मुस्ताङलाई आकर्षक बनाएका छन्।
