फिफा अध्यक्ष जियानी इन्फान्टिनोले विश्व फुटबलको ठुलो बहुमतको समर्थन आफूलाई रहेको दाबी गरेका छन्। बीबीसी स्पोर्ट्ससँगको अन्तर्वार्तामा उनले फिफाभित्र फरक विचार हुनु स्वाभाविक भएको र सबैको मत र विचारको सम्मान गर्नुपर्ने बताए।
फिफाको व्यावसायिक अधिकार निजी लगानी कम्पनीलाई बेच्ने प्रस्ताव ‘फिफा फर्वार्ड इन्टरप्राइज’ (एफएफई) विवादमा परेपछि उनीमाथि राजीनामाको दबाब बढेको थियो। युरोपेली फुटबल महासङ्घ (यूईएफए) सहित विभिन्न निकायले प्रस्तावसम्बन्धी कागजात सार्वजनिक गर्न माग गरेका छन्।
इन्फान्टिनोले एसियाली फुटबल महासङ्घ र अफ्रिकी देशहरूको समर्थन आफूलाई रहेको दाबी गर्दै आगामी वर्ष हुने फिफा अध्यक्षको निर्वाचनमा पुनः निर्वाचित हुने सम्भावना बलियो बनाएका छन्। निर्वाचनमा उम्मेदवारी दिने अन्तिम म्याद नोभेम्बर १८ रहेको छ।
यो दाबी यस्तो बेला आएको हो, जब व्यावसायिक अधिकार बिक्रीको प्रस्तावलाई लिएर फिफाभित्रै मतभेद चर्किएको छ। विरोधका बाबजुद एसिया र अफ्रिकाको साथले आफ्नो पुनः निर्वाचनको बाटो बलियो भएको उनको तर्क छ।
