गोरखाको चुम उपत्यकातर्फ जाने पदमार्ग करिब दुई साताको अवरोधपछि फेरि खुलेको छ। असोज २५ गते बुढीगण्डकीको सहायक खोलामा आएको बाढीले बाटो बगाएपछि उक्त मार्ग बन्द भएको थियो। चुमनुब्री गाउँपालिकाभित्रका चुम्चेत र छेकम्पार वडालाई जोड्ने बाटो पनि सोही बाढीले क्षति पुर्‍याएको थियो। सर्दीभिरमा रहेको क्यान्टिलिभर पुलमा समेत बाढीले असर पारेको थियो, जसका कारण त्यहाँ अस्थायी रूपमा काठका पुलहरू राखिएका छन्। आपतकालीन रूपमा चार वटा काठे पुल निर्माण भएपछि मानिस र खच्चडलाई खोला तर्न सहज भएको छ। गाउँपालिका अध्यक्ष निमा लामाका अनुसार चुम उपत्यका पदमार्ग आइतबारदेखि पुनः सञ्चालनमा आएको छ। वडा नम्बर ६ र ७ हुँदै चुम उपत्यका पुग्ने मूल बाटो खुलेसँगै पर्यटकहरू अब सहजै त्यहाँ पुग्न सक्ने उनले बताए। बाटो र पुल मर्मतमा स्थानीय बासिन्दाले दिनरात मेहनत गरेका थिए। स्वदेश र विदेशमा रहेका स्थानीयले मर्मत टोलीको खाजा खर्चसमेत जुटाएर सहयोग गरेका थिए।