काठमाडौं । भदौ १० गते रसुवा–भोटेकोशी क्षेत्रमा आएको बाढीले सर्वसाधारणको निजी सम्पत्तिमा मात्र ७९ अर्ब १७ करोड रुपैयाँ बराबरको नोक्सानी पुर्याएको प्रारम्भिक अनुमान सार्वजनिक भएको छ । राष्ट्रिय योजना आयोगले विपद्पछिको आवश्यकता मूल्यांकनअन्तर्गत गरेको घरधुरी सर्वेक्षणको सुरुआती नतिजामा यो तथ्यांक देखिएको हो । सडक र जलविद्युत् लगायतका पूर्वाधारमा पुगेको क्षति यो आँकडामा समेटिएको छैन ।
कुल नोक्सानीमध्ये ६९ अर्ब ५७ करोड रुपैयाँ घरपरिवारको सम्पत्तिमा र ९ अर्ब ६० करोड रुपैयाँ व्यवसाय तथा प्रतिष्ठानको सम्पत्तिमा परेको छ । निजी क्षतिको करिब ८८ प्रतिशत भार घरपरिवारले नै बोकेका छन् । रसुवा, नुवाकोट, धादिङ र गोरखाका १५ स्थानीय तहमा ६ हजार ८ सय १७ घरपरिवार र १ हजार ६ सय ३८ व्यवसाय प्रभावित भएका छन् भने प्रत्यक्ष प्रभावित व्यक्तिको संख्या ३२ हजार ८ सय ७२ पुगेको छ ।
नुवाकोट सबैभन्दा बढी प्रभावित छ, जहाँ १७ हजार ९ सय ५४ जना प्रभावित भएका छन् । रसुवामा ९ हजार ६ सय ७६, धादिङमा ४ हजार ५ सय ८४ र गोरखामा ६ सय ५८ जना प्रभावित भएका छन् । सबैभन्दा ठूलो मार जग्गाजमिनमा परेको छ — ३ हजार ६ सय १० परिवारको ५ सय ८ हेक्टर जमिनमा ३५ अर्ब ४४ करोड रुपैयाँको क्षति पुगेको छ ।
यस्तै ३ हजार ९ सय ६७ घरधनीका ४ हजार १ सय ५१ भवन संरचनामा क्षति पुगेको छ, जसमध्ये ३ हजार १ सय ४ संरचना फेरि प्रयोग गर्नै नसकिने अवस्थामा छन् । मन्त्रिपरिषद्को भदौ १२ गतेको निर्णयपछि आयोगले ५८ टोलीमा १ सय ५६ जनशक्ति खटाएर तथ्यांक संकलन गरेको थियो, तथ्यांकको प्रशोधन तथा विश्लेषण जारी रहेको आयोगले जनाएको छ ।
