राष्ट्रिय स्वतन्त्र पार्टीका सांसद मनिष झाले आफ्नो पार्टी संघीयताविरुद्ध नरहेको स्पष्ट पारेका छन्। जनकपुरमा आयोजित एक कार्यक्रममा बोल्ने क्रममा उनले संघीय व्यवस्थालाई अझ व्यवस्थित, दक्ष र मजबुत बनाउनुपर्ने आवश्यकता औंल्याए।
सांसद झाले प्रदेश सभा र प्रदेश परिषद्सम्बन्धी अवधारणालाई अघि बढाउनुपर्ने बताए। संघीय संरचनालाई व्यवहारमै प्रभावकारी बनाउन यस्ता संस्थागत व्यवस्थामा ध्यान दिनुपर्ने उनको भनाइ थियो।
उनले राजनीतिक जीवनमा एकता र सहकार्यलाई प्राथमिकता दिनुपर्नेमा जोड दिए। आन्तरिक विवाद र एकअर्कामाथि आरोपप्रत्यारोपले राजनीतिलाई कमजोर बनाउने भन्दै उनले अध्ययन, विचार र संस्कृतिमा आधारित राजनीति गर्नुपर्ने बताए।
पछिल्लो निर्वाचनमा मधेसमा आफ्नो पार्टीले राम्रो मत पाएको स्मरण गर्दै झाले आगामी स्थानीय निर्वाचनका लागि पनि एकताबद्ध भएर अघि बढ्नुपर्ने बताए। मधेसी समुदायभित्रका विवाद अन्त्य गरेर साझा लक्ष्यतर्फ अघि बढ्नु आजको आवश्यकता भएको उनको भनाइ थियो।
उनले राजनीतिक दल र नेताहरूले व्यक्तिगत स्वार्थभन्दा माथि उठेर जनताको हितमा काम गर्नुपर्ने सन्देश पनि दिए। विचार र संस्कारयुक्त राजनीतिले मात्र जनताको विश्वास जित्न सकिने उनको तर्क थियो।
