दुबई । विश्वकै ठूलो यात्रुवाहक विमान एयरबस ए३८० का ठूलो प्रशंसक अरुण राजगोपालले आफ्नो दुबईस्थित घरलाई विमानको प्रथम श्रेणी क्याबिनजस्तै बनाएका छन् । विमानका विभिन्न सामग्री सङ्कलन गरेर उनले घरमै विलासी हवाई यात्राको अनुभव तयार पारेका हुन् ।
ए३८० प्रतिको उनको आकर्षण चौथो पटक उक्त विमानमा यात्रा गरेपछि सुरु भएको थियो । सिंगापुर जाने क्रममा बिजनेस क्लासमा यात्रा गर्दा फराकिला सिट र विमानको पछिल्लो भागमा रहेको बारले उनलाई प्रभावित पारेको थियो । त्यसयता उनी सम्भव भएसम्म ए३८० मै यात्रा गर्न थाले । हालसम्म उनले ६ महादेशमा करिब ७ लाख १५ हजार माइल यात्रा गरिसकेका छन् भने २२० पटक ए३८० मा उडिसकेको सीएनएनको समाचारमा उल्लेख छ ।
विमानप्रतिको यही लगाव उनले घरमा पनि उतारेका हुन् । उनको घरमा एमिरेट्सको पहिलो ए३८० विमानका दुई वटा प्रथम श्रेणी सिट, प्रथम श्रेणी क्याबिनका बत्ती र विमानको पाङ्ग्रालाई पुनः प्रयोग गरेर बनाइएको कफी टेबल छन् । तर घरको मुख्य आकर्षण इतिहाद एयरवेजको विलासी तीन कोठे निजी सुइट ‘द रेसिडेन्स’ को बैठक कक्ष हो । उनले एक वर्ष लगाएर आफ्नै बैठक कक्षमा उक्त सुइटको स्वरूप तयार पारेका हुन् ।
सन् २००२ मा सार्वजनिक भएको एयरबस ए३४०–६०० त्यसबेला विश्वकै सबैभन्दा लामो यात्रुवाहक विमान बनेको थियो । तर व्यावसायिक रूपमा भने यो विमानले अपेक्षित सफलता पाउन सकेन । चार वटा इन्जिन भएकाले यसले धेरै इन्धन खपत गर्छ भने २४७ फिट लामो संरचनाका कारण विमानस्थलमा विशेष धावनमार्ग व्यवस्थापन आवश्यक पर्छ । विमानको कार्गो राख्ने ठाउँमा बनाइएको शौचालय यसको अर्को फरक विशेषता हो । विमान कम्पनीमाझ लोकप्रिय हुन नसके पनि ए३४०–६०० ले हवाई उड्डयनप्रेमी र विमान चालक दलका सदस्यबिच छुट्टै प्रशंसक समूह बनाएको छ । यसै महिनाको सुरुआतमा जर्मन विमान कम्पनी लुफ्थान्सासँगको ए३४०–६०० को सम्बन्ध अन्त्य हुने उडान हेर्न वासिङ्टन डुल्स अन्तर्राष्ट्रिय विमानस्थलमा हवाईप्रेमीको भीड लागेको थियो ।
