तनहुँको आँबुखैरेनीमा आइतबार साँझ भएको माइक्रो दुर्घटनामा चालकसहित ११ जना घाइते भएका छन्। पृथ्वीराजमार्गको आँबुखैरेनी गाउँपालिका–२ बरादी क्षेत्रमा भएको दुर्घटनामा घाइते सबैलाई उपचारका लागि आँबुखैरेनी अस्पताल लगिएको छ।
मुग्लिङबाट पोखरातर्फ जाँदै गरेको बा ४ ख ८४१९ नम्बरको माइक्रो चालकले नियन्त्रण गुमाउँदा सडकमा डाइभर्सनका लागि राखिएको सिमेन्टेड डिभाइडरमा ठोक्किएको जिल्ला प्रहरी कार्यालय तनहुँले जनाएको छ। ठक्करपछि माइक्रोमा सवार यात्रुहरू घाइते भएका हुन्।
घाइते हुनेमा स्याङ्जाको पुतलीबजार नगरपालिका–१ का ३७ वर्षीय चालक भद्रबहादुर शाह, कास्कीको पोखरा महानगरपालिका–७ की ६३ वर्षीया राधादेवी बराल र ७३ वर्षीय लीलाधर बराल छन्। त्यस्तै पर्साको सखुवा पर्सौनीकी ३५ वर्षीया सपना चौधरी, पोखरा–१३ की ७३ वर्षीया चुनकुमारी गुरुङ र ४९ वर्षीया राधा गुरुङ तथा ३७ वर्षीय राजकुमार श्रेष्ठ पनि घाइते भएका छन्।
बागलुङको बडीगाड–७ की २५ वर्षीया विपिना विक, महोत्तरीको बलवा नगरपालिका–७ का ३६ वर्षीय रुपेश मिश्र, तनहुँको व्यास नगरपालिका–१ का २३ वर्षीय विकास ठकुरी र बन्दीपुर गाउँपालिका–२ की २८ वर्षीया सृजना अछामी पनि दुर्घटनामा परेका छन्।
दुर्घटनाको कारणबारे प्रहरीले थप अनुसन्धान गरिरहेको जिल्ला प्रहरी कार्यालय तनहुँका प्रहरी नायब उपरीक्षक द्वारिकाप्रसाद घिमिरेले जानकारी दिए।
