गत वैशाखदेखि कात्तिक १५ गतेसम्मको अवधिमा देशभर ७ हजार ६ सय ८८ वटा विपद्का घटना भएका छन्। ती घटनामा परी ४ सय २ जनाको मृत्यु भएको छ भने १७ जना अझै बेपत्ता छन्।
राष्ट्रिय विपद् जोखिम न्यूनीकरण तथा व्यवस्थापन प्राधिकरणले सार्वजनिक गरेको तथ्याङ्कअनुसार यस अवधिमा पहिरोका १ हजार ७ सय ३५, सर्पदंशका १ हजार ६ सय ६८ र आगलागीका १ हजार ६ सय ४१ घटना भएका छन्। भारी वर्षाका ५ सय ९३, हुरीबतासका ५ सय ३७, बाढीका ४ सय ६६, जनावरको आक्रमणका ४ सय १७ र चट्याङका ३ सय ३३ घटना भएका छन्।
त्यसैगरी वन डढेलोका १ सय ९२, लेक लाग्नेका ७९, हिउँपहिरोका ६, भूकम्पका ९, असिनाका ४, डुङ्गा पल्टिनेका २, विस्फोटनको १ र अन्य ५ घटना भएका छन्।
विपद्का कारण सबैभन्दा धेरै सर्पदंशबाट १ सय १६ जनाको मृत्यु भएको छ। पहिरोबाट ७७, बाढीबाट ४१, चट्याङबाट ३६, आगलागीबाट ३२, लेक लागेर २७, जनावरको आक्रमणबाट २३, हिउँपहिरोबाट १९ र हुरीबतासबाट १६ जनाको मृत्यु भएको छ। भारी वर्षाबाट ७, डुङ्गा पल्टिएर ५, वन डढेलोबाट १, विस्फोटनबाट १ र अन्य घटनामा ५ जनाको मृत्यु भएको छ।
प्राधिकरणका प्रवक्ता एवं उपसचिव रामबहादुर केसीका अनुसार विपद्का घटनामा परी हालसम्म २ हजार ५ सय २९ जना घाइते भएका छन् भने ९ हजार ८ सय ५७ परिवार विस्थापित भएका छन्।
यसैबीच भदौ १० गते रसुवाको भोटेकोशीमा आएको बाढीको विस्तृत क्षति विवरण प्रणालीमा समावेश गर्न बाँकी रहेकाले यो तथ्याङ्कमा त्यसको विवरण समेटिएको छैन।
