नेपाली कांग्रेसको १५औँ नियमित महाधिवेशनको तयारीअन्तर्गत चितवनमा सम्पन्न जिल्ला अधिवेशनले नयाँ नेतृत्व चुनेको छ। अधिवेशनले मिलनबाबु श्रेष्ठलाई जिल्ला सभापतिमा चयन गरेको हो। उनको नेतृत्वमा नयाँ जिल्ला समिति गठन भएको छ।
नयाँ समितिको उपसभापतिमा दीपक अधिकारी र सचिवमा घनश्याम पौडेल ‘श्याम’ चयन भएका छन्। सदस्यहरूमा माधव अधिकारी, रेणु प्रधान, सञ्जय आचार्य, गोविन्दबहादुर गुरुङ, विष्णुभक्त न्यौपाने, भुपाल गुरुङ, राजीव चौधरी र लोकनाथ पौडेल रहेका छन्।
जिल्लाका विभिन्न भूगोल र क्षेत्रको प्रतिनिधित्व समेटेर समितिलाई अझ समावेशी बनाइने जनाइएको छ। केन्द्रीय महाधिवेशन सुरु हुनुअघि नै आवश्यक प्रतिनिधित्व सुनिश्चित गर्दै जिल्ला समितिलाई पूर्णता दिइने बताइएको छ।
देशभर जिल्ला अधिवेशनहरू सम्पन्न हुँदै गएका छन्। नयाँ नेतृत्व आएपछि चितवनमा १५औँ नियमित महाधिवेशनको तयारी र संगठन विस्तारको कामले थप गति लिने अपेक्षा गरिएको छ।
