काठमाडौं — नेपाल प्रिमियर लिगको तेस्रो संस्करणमा काठमाडौं गोर्खाजले सोमबार कर्णाली याक्सलाई ६ विकेटले पराजित गर्दै सिजनको पहिलो जित हात पारेको छ। कर्णालीले दिएको १८१ रनको लक्ष्य गोर्खाजले दुई बल बाँकी छँदै पूरा गर्यो।
खेलअघि सबैको ध्यान अस्ट्रेलियाका स्टार डेभिड वार्नरमाथि थियो। आइतबार राति काठमाडौं आइपुगेका वार्नरले गोर्खाजबाट डेब्यू गरे। उनले १६ रन बनाए र एउटा उत्कृष्ट क्याच पनि लिए। कर्णालीका कप्तान सोमपाल कामीले उनलाई बोल्ड गरे।
तर खेलको नतिजा नेपाली खेलाडीले नै निर्धारण गरे। रासिद खानले ३२ बलमा तीन चौका र दुई छक्कासहित ५० रन बनाए। यो उनको एनपीएल करिअरकै पहिलो अर्धशतक हो। कप्तान करण केसीले २० बलमा चार चौका र तीन छक्कासहित ४४ रन बनाए र प्लेअर अफ द म्याच घोषित भए। बलिङमा पनि करणले दुई विकेट लिए। जहानदाद खानले १० बलमा अविजित २२ रन बनाएर खेल टुंग्याए।
यसअघि टस हारेर ब्याटिङ गरेको कर्णालीले २० ओभरमा छ विकेट गुमाएर १८० रन बनाएको थियो। अरिफुल इस्लामले २२ बलमा ४४ र हुसेन तलतले ४० रन बनाए। तलतले बलिङमा दुई विकेट पनि लिए।
पहिलो खेलमा जनकपुर बोल्ट्ससँग हारेको गोर्खाजले दोस्रो खेलमा जित निकाल्दै लयमा फर्कने संकेत दिएको छ।
