बाँकेको नेपालगन्जमा रहेको वेस्टर्न अस्पताललाई ट्रमा सेन्टरका रूपमा विकास गर्ने काम सुरु भएको छ। सडक दुर्घटना र आकस्मिक चोटपटकका गम्भीर घाइतेलाई छिटो र विशेषज्ञ उपचार दिने उद्देश्यले अस्पतालले आफ्नो सेवालाई थप विशिष्टीकृत बनाउने तयारी थालेको हो।
अस्पतालका निर्देशक डा राहुल थापाका अनुसार दुर्घटनामा गम्भीर घाइते भएका बिरामीको ज्यान जोगाउन तत्काल उपचार, दक्ष जनशक्ति र आवश्यक उपकरणको उपलब्धता निर्णायक हुन्छ। यही आवश्यकतालाई ध्यानमा राखेर नेपालगन्जको वेस्टर्नलाई ट्रमा सेन्टरका रूपमा विकास गर्ने प्रक्रिया अघि बढाइएको उनले बताए।
यसका लागि अस्पतालले विशेषज्ञ जनशक्ति थप्ने, अत्याधुनिक उपकरण भित्र्याउने र शल्यक्रिया सेवाको क्षमता विस्तार गर्ने योजना बनाएको छ। नाम मात्रैको नभई सम्पूर्ण मापदण्ड पूरा गरेर यस क्षेत्रकै पहिलो ट्रमा सेन्टर बन्ने लक्ष्य रहेको डा थापाको भनाइ छ।
हाल १०० शय्याको स्वीकृति पाएको अस्पतालमा हाडजोर्नी तथा नसासम्बन्धी सेवा, प्रसूति तथा स्त्रीरोग, नाक, कान तथा घाँटी, ग्यास्ट्रो सर्जरी र जनरल सर्जरीलगायत सेवा सञ्चालनमा छन्। गम्भीर प्रकृतिका बिरामीलाई २४सै घण्टा विशेषज्ञ चिकित्सक र नर्सको निगरानीमा भेन्टिलेटरसहितको उपचार दिँदै आएको अस्पतालले उपत्यका बाहिर पहिलो पटक लेभल थ्री आइसीयू सेवा सञ्चालन गरेको छ। सिटी स्क्यानबाट रोग पहिचान र उपचार सेवा पनि उपलब्ध छ।
अब अस्पतालले न्युरोसर्जरी, कार्डियोलोजी, प्लास्टिक तथा पुनर्निर्माण शल्यचिकित्सा र बालरोग विशेषज्ञ सेवा विस्तार गर्ने योजना बनाएको छ। हाडजोर्नी उपचारलाई थप व्यवस्थित बनाउन जोर्नी प्रत्यारोपणका लागि छुट्टै शल्यक्रिया कक्ष सञ्चालनमा ल्याउने तयारी छ, जसका लागि दुई वटा शल्यक्रिया कक्ष निर्माण भइरहेको छ।
वेस्टर्न अस्पताल ट्रमा सेन्टरका रूपमा विकास भएपछि नेपालगन्ज आसपाससहित पश्चिम नेपालका जटिल चोटपटक तथा हाडजोर्नीका बिरामीले नजिकै विशेषज्ञ उपचार पाउने अपेक्षा गरिएको छ।
