काठमाडौं । शिक्षा तथा खेलकुदमन्त्री सस्मित पोखरेल थाइल्यान्ड जाने भएका छन् । एसियाली फुटबल महासंघ (एएफसी) को आयोजनामा हुने एएफसी अवार्ड्समा सहभागी हुन उनी यही १९ नोभेम्बरमा थाइल्यान्डको राजधानी बैंकक जान लागेका हुन् । एएफसीको निमन्त्रणामा मन्त्री पोखरेल थाइल्यान्ड जान लागेको मन्त्रालय स्रोतले जनाएको छ ।
अवार्ड समारोहमा सहभागी हुने क्रममा मन्त्री पोखरेलले एन्फाको निलम्बन फुकुवाका विषयमा एएफसी र फिफाका उच्च पदाधिकारीसँग वार्ता गर्नेछन् । वार्तामा नेपालको तर्फबाट मन्त्रीसहितका केही प्रतिनिधि सहभागी हुनेछन् ।
मन्त्रालय स्रोतका अनुसार एएफसीबाट निमन्त्रणा आएसँगै वार्ताको कार्यक्रम तय भएपछि मन्त्री आफैँ सहभागी हुन लागेका हुन् । स्रोतले वार्तालाई एन्फाको निलम्बन फुकुवाका लागि निर्णायक हुने अपेक्षा गरेको छ ।
फिफाले तेस्रो पक्षको हस्तक्षेप भएको भन्दै ११ असारमा अखिल नेपाल फुटबल संघ (एन्फा) लाई अनिश्चितकालका लागि निलम्बन गरेको थियो । निलम्बन फुकुवाका विषयमा सरकार र फिफाबीच यसअघि भर्चुअल वार्ता भइसकेको छ । मन्त्रालय स्रोतले फिफा र एएफसी सकारात्मक रहेको र वार्ताबाट निकास निस्कने दाबी गरेको छ ।
