नेपाल प्रिमियर लिगको तेस्रो संस्करणमा सोमबार भएका दुवै खेलमा लक्ष्य पछ्याउने टोलीले जित हात पारे । पहिलो खेलमा काठमाडौँ गोर्खाजले कर्णाली याक्सलाई ४ विकेटले हराउँदै प्रतियोगितामा पहिलो जित दर्ता गर्यो भने दोस्रो खेलमा सुदूरपश्चिम रोयल्सले चितवन राइनोजलाई ५ विकेटले पराजित गर्यो ।
काठमाडौँका लागि यो खेल डेभिड वार्नरको एनपीएल डेब्यूका कारण विशेष चासोको विषय बनेको थियो । तर अस्ट्रेलियाका अनुभवी ब्याटरले १० बलमा ३ चौकासहित १६ रन मात्र बनाए । उनी कप्तान सोमपाल कामीको बलमा बोल्ड भए । अर्का ओपनर स्मिथ पटेल पनि ११ बलमा ९ रनमा आउट भए ।
वार्नर चाँडै पभेलियन फर्किए पनि काठमाडौँले १८१ रनको लक्ष्य १९ ओभर ४ बलमा ६ विकेट गुमाएर पूरा गर्यो । अफगानिस्तानका राशिद खानले ३२ बलमा ३ चौका र २ छक्कासहित ५० रन बनाए भने कप्तान करण केसीले २० बलमा ४ चौका र ३ छक्कासहित ४४ रन जोडे । अन्तिमतिर जहानदाद खानले १० बलमा अविजित २२ रन बनाए । यसअघि कर्णालीले २० ओभरमा ६ विकेट गुमाएर १८० रन बनाएको थियो । आरिफुल इस्लामले ४४ र हुसेन तलतले ४० रन जोडे ।
दोस्रो खेलमा चितवनका कप्तान सिकन्दर राजाले पनि एनपीएल डेब्यू गरे । जिम्बाब्वेका अलराउन्डरले २० बलमा १५ रन बनाए भने ४ ओभर बलिङ गर्दा २६ रन खर्चिएर विकेट लिन सकेनन् । चितवनले २० ओभरमा ६ विकेट गुमाएर १२९ रन मात्र बनायो । रवि बोपाराले ४० बलमा ४९ रन बनाए । सुदूरपश्चिमले १६ ओभर ४ बलमा ५ विकेट गुमाएर १३० रनको लक्ष्य पूरा गर्यो । ओपनर ब्रान्डन म्याकमलेनले २१ बलमा ६ चौका र २ छक्कासहित ४३ रन बनाए भने डा. इशान पाण्डेले २५ रन जोडे ।
खेलपछि सुदूरपश्चिमका शर्फेन रदरफोर्डले नेपाली क्रिकेटको प्रशंसा गरे । उनले नेपाली खेलाडीमा राम्रो प्रतिभा रहेको र भविष्य उज्ज्वल रहेको बताए । उनले कप्तान दीपेन्द्रसिंह ऐरीको खेल्ने शैली र नेतृत्वको पनि खुलेर प्रशंसा गरे ।
सोमबारका नतिजापछि चार खेलमा चार अंक जोडेको सुदूरपश्चिम तेस्रो स्थानमा उक्लिएको छ भने चितवन पाँचौँ स्थानमा झरेको छ । काठमाडौँले पहिलो जितसँगै खाता खोलेको छ भने कर्णालीले चार खेलपछि पहिलो हार बेहोरेको छ । मंगलबार विराटनगर किङ्ग्स र जनकपुर बोल्ट्स तथा लुम्बिनी लायन्स र पोखरा एभेन्जर्सबीच खेल हुँदैछ ।
