पोखरा — पर्यटकीय सहर पोखरामा नयाँ विद्युतीय कार सार्वजनिक भएको छ। सीजी मोटर्सले जेएमईभी नामको नयाँ विद्युतीय गाडी औपचारिक रूपमा बजारमा ल्याएको हो।
यो गाडी टीटी ईभी रिभोलुसनले उत्पादन गरेको हो भने नेपालमा सीजीले भित्र्याएको हो। सार्वजनिक भएकै दिन ग्राहकको उत्साहजनक साथ देखिएको छ — पहिलो दिनमै ८१ वटा गाडी बुकिङ भएका छन् भने ९ वटा गाडी सोही दिन ग्राहकलाई हस्तान्तरण गरिएको आधिकारिक विक्रेता टिटी इन्टरनेसनल प्रालिका निर्देशक प्रमेश पराजुलीले जानकारी दिए।
‘सार्वजनिक भएको दिनमै यति धेरै बुकिङ हुनु सुखद कुरा हो,’ पराजुलीले भने, ‘नेपाली सडक सुहाउँदो गाडी बनेको छ, त्यसैले सबैको रोजाइमा पर्छ भन्ने विश्वास छ।’
‘डिजाइन फर मोर, ड्रिभन बाइ इनोभेसन’ अवधारणामा तयार गरिएको यो गाडीको सुरुवाती मूल्य ३१ लाख ९९ हजार रुपैयाँ तोकिएको छ। कम्पनीका अनुसार गाडीमा ३०.२४ किलोवाट आवरको ब्याट्री र ५० किलोवाट क्षमताको मोटर जडान गरिएको छ। एकपटक पूर्ण चार्ज गर्दा ३ सय ३० किलोमिटरसम्म गुड्न सक्ने कम्पनीको दाबी छ।
सुरक्षा र सुविधाका लागि आईपी ६८ रेटिङयुक्त ब्याट्री, वायरलेस चार्जिङ सुविधा, ५४० डिग्री सराउन्ड भ्यु क्यामेरा र ८६.५९ प्रतिशत स्पेस इफिसियन्सीजस्ता सुविधा समावेश गरिएको पराजुलीले बताए।
सार्वजनिक अवसरमा सीजी मोटर्सले समूह बुकिङ अफर पनि ल्याएको छ। एकैपटक ५ वटा गाडी बुकिङ गर्दा १ लाख रुपैयाँ छुट पाइनेछ भने लञ्चिङ अफरअन्तर्गत प्रत्येक गाडीमा १ लाख रुपैयाँ छुट दिइएको छ।
