काठमाडौँ — मुख्य सचिव गोविन्दबहादुर कार्कीको अध्यक्षतामा बसेको सरकारका सचिवहरूको बैठकले प्रशासनिक कामकारबाहीलाई चुस्त बनाउने र नागरिकलाई दिने सेवालाई प्रभावकारी बनाउने निर्णय गरेको छ। बैठकले प्रशासनलाई नागरिकमैत्री बनाउँदै सेवामा हुने ढिलाइ हटाउने लक्ष्य लिएको छ।
बैठकले चालु आर्थिक वर्ष २०८३/८४ को वार्षिक कार्ययोजना तथा नीति र कार्यक्रम कार्यान्वयन गर्न तयार पारिएको विस्तृत कार्ययोजनालाई सम्बन्धित सचिवहरूले तोकिएको समयभित्र प्रभावकारी रूपमा अघि बढाउने निर्णय गरेको छ।
आर्थिक अनुशासन कायम गर्न महालेखा परीक्षकको वार्षिक प्रतिवेदनमा देखाइएका बेरुजु फर्छ्यौट गर्न महालेखा परीक्षकको कार्यालय, सार्वजनिक लेखा समिति र बेरुजु फर्छ्यौट अनुगमन समितिसँग समन्वय गर्ने निर्णय भएको छ। सबै मन्त्रालय तथा निकायले बेरुजु फर्छ्यौट तथा न्यूनीकरण कार्ययोजना तयार पारी अनिवार्य रूपमा लागू गर्नुपर्ने भएको छ।
चाडपर्वको समयमा बजार र सुरक्षा व्यवस्थालाई व्यवस्थित बनाउन बैठकले विशेष जोड दिएको छ। तिहार तथा छठका बेला हुनसक्ने झैझगडा र विवादमा कडा निगरानी राख्दै शान्ति सुरक्षा चुस्त राख्ने व्यवस्था गृह मन्त्रालयले मिलाउने निर्णय भएको छ। चाडपर्व लक्षित बजार अनुगमनलाई पनि तीव्रता दिइने भएको छ।
